17-июлдиз Ахцегьа «Фольклордин сад тир югъ» лишандик кваз тешкилай медениятдин сувар гегьеншдиз къейдна. Гьар йисуз кьиле тухун хъсан адетдиз элкъвенвай и межлисди чкадин хейлин агьалияр ва мугьманар вичел желбна. Гьа икI, сувари Ахцегьрин чилин адетрин девлетлувал къалурна.

Райондин кьил Абдул-Керим Палчаеван тIварцIихъай тебрикдин гаф депутат­рин собранидин председатель Гьажимурад Парпачева лагьана.

Суварин тешкилатчи тир райондин адми­нистрациядин медениятдин управленидин къуллугъчийрин къуватралди­ гьазурнавай концерт суварин кьилин мярекатдиз элкъвена. Сувар кьиле физвай­ вири­ вахтунда халкьдин кьуьлерини ри­кIиз хуш манийри ванзавай. «Набережный» парк мугьманрив ацIанвай: абуруз самовардай атирлу чай теклифзавай, дагъдин таза гьавади ва вацIун кьезил шагьварди тIебиатдихъ галаз садвилин гьисс ба­гъиш­завай.

Рутул райондай тир мугьман Вали Шагьбанован алакьунар суварин иштиракчийриз иллаки бегенмиш хьана. Сегьнедиз адан гьар са экъечIун кIватI хьанвайбуру гурлу капар ягъуналди къаршиламишна. Межлис куьтягь жедалди инсанрихъ суварин гуьгьуьлар авай. Абур мярекатдай рикIера хуш гьиссер аваз хъфена. 

Дашдемир Шерифалиев