Шумудни са шегьер, хуьр, мензил атIуз,

Илифда газет халкьарал, гуьгьуьл къачуз.

Ви дувулри деринра, кIватIиз девлет,

Виш йисан юбилей ви, “Лезги газет”.

 

Гьам Шекида, гьам Къубада, Куьреда,

КIелиз жеда, кIвалерани куьчеда.

Чи дагълух вири газетрин жергеда

Ви дад, ви ад ава вине, “Лезги газет”!

 

Масан я, газет, ви тIвар Лезгистандиз,

Вун хтайла, хупI шад жеда хизандиз.

Галат тийиз къуллугъа чи Ватандиз,

Хуш я чаз ви, юбилей мубаракиз!

 

Къуй лезги халкь ви далудихъ галаз хьуй,

Газетдин кьадар югъ-къандвай  алаз хьуй,

Милли чIал, цIийи хабар къалаз хьуй,

“Лезги газет”, ваз юбилей мубарак!

 

ЦипицI, хурма, медни гъери — суьрсет я,

Чи багъри чIал — михьи гуьзгуь, суьрет я.

Ваз гузвайди элди чIехи къимет я,

РикIин чим, дава-дарман, “Лезги газет”

 

Жува кIелиз, вахъ даим зи вил жеда,

Тийижир шей, гьелбет, гьанай чир жеда.

Чахъ лезги халкь амай кьван вал  гуьл жеда,

“Лезги газет”, ваз юбилей мубарак!

Рамазан Дадашев