Дагъустандин Гьукуматдин Председатель Абдулмуслим Абдулмуслимован регьбервилик кваз 17-мартдиз заседание кьиле фена. Анал маса месэлайрихъ галаз медицинадин идарайри къачунвай кредитрин буржар ахлудунин гьакъиндай кьабулзавай серенжемарни веревирдна.
Премьер-министрди къейдна хьи, виликдай медицинадин идарайрал алай буржар ахлудун анихъ амукьрай, эхиримжи вацра абур мадни гзаф хьанва. Кредитрин буржар са йис идалай вилик хьиз, гьи больницайрал алайтIа, гьабурал алама.
«Алатай йисан делилриз килигайтIа, йисан вири вахтунда бурж тIимил жезвайди хьиз аквазвай. Амма гьакъикъатда йис чна мад гьа буржар алаз куьтягьна. Январдин ва февралдин варцара буржарин кьадар мадни виниз акъатна», — лагьана Абдулмуслим Абдулмуслимова.
РД-дин здравоохраненидин министр Ярослав Глазова хабар гайивал, кьиле тухвай ахтармишунри къалурна хьи, медицинадин кьуд идаради тамамвилелди чпин буржар ахлудна. Абурук Къумтуркъала, Кьурагь, Агъул районрин больницаяр ва 8 – нумрадин поликлиника акатзава.
Мярекатдал РД-дин вице-премьер Абдурагьман Магьмудова мисалар гъайивал, медицинадин бязи идарайра кьасухдай кIвалахзавай инсанрин кьадар артухарнава.
Абдулмуслим Абдулмуслимова буржар алай медицинадин идарайрин кьадар тIимиларунин ва кIвалахда еке кимивилериз рехъ ганвай идарайрин кьилин духтурар жавабдарвилиз чIугунин тапшуругъ гана.
Хийир Эмиров
