Каспийскдай тир 52 йисан яшда авай дишегьлиди парталар чуьхуьдай машин, вучиз ятIани, туьквендай ваъ, интернетдай маса къачун кьетIна. Малуматри адан фикир Санкт-Петербургда маса гузвай машинкадал желбна. Гьа икI, ам и шегьердин 32 йисан яшда авай агьалидихъ галаз адавай парталар чуьхуьдай машинка маса къачудай меслятдал атана.
Къимет 50 агъзур манат ва Дагъустандиз ахгакьарунин гьакъини яз 5 агъзур манат тирди лагьана, маса гузвайда муьштери рази авуна. Дишегьлиди, вичихъ галаз савда ийизвайди луту тирди гьич фикирни тавуна, адаз меслят хьайи пул ракъурна. Пул агакьайвалди, тапан савдагар алакъадал аламукьнач — телефон хкудна. Амма луту чкадин полициядин къуллугъчийри жагъурна. Хкана ам Махачкъаладиз. Дишегьлиди ракъурай пул гьинава лагьана хабар кьурла, ада вичин игьтияжар патал серфайди хиве кьуна.
Чи мухбир
