Россиядин лайихлу художник Шариф Шагьмарданова вичин хсуси коллекциядай Лезги театрдиз грекрин сграффитодин техникадалди арадал гъанвай кьетIен фрескаяр пишкешна. Шаксуз, абуру дараматда кьетIен гьава арадал гъизва ва рикIерик гьевес кутазва.
Ш. Шагьмарданов 1947-йисуз Ахцегьа дидедиз хьана. 1972-йисуз И.Е. Репинан тIварунихъ галай живописдин, скульптурадин ва архитектурадин институт акьалтIарна. 2021-йисалай ам Россиядин художествойрин академиядин (РАХ) академиквиле хкяна. Машгьур скульптор 20-далай виниз монументрин авторни я. Адан гъиликай хкатнавай эсерар, Россиядин хьиз, къецепатан уьлквейрин хсуси ксарин коллекцийрани хуьзва. Чи ватанэгьли республикадин, Вирисоюздин, Россиядин ва къецепатан уьлквейрин выставкайрин иштиракчи я. Алай вахтунда ада Лезги театрдин бине эцигай Идрис Шамхалован бюст арадал гъунал кIвалахзава. Ам цIи июндиз Ахцегьа ачухун гуьзетзава.
Са тIимил вахт идалай вилик Дербентда Дагъустандин халкьдин шаир СтIал Сулейманаз ачухай памятникдин авторни Шариф Шагьмарданов тирди рикIел хкиз кIанзава. Чи ватанэгьлидин алакьунар, агалкьунар, гьакIни культура ва искусство вилик тухуник кутунвай лайихлу пай гзаф кьадар премийралдини шабагьралди къейднава.
Дильшад Велиева
