Кьурагь районда

Куьмек гуда

Замир Азизова и йикъара Кьурагь райондин Арабляр хуьряй тир СВО-да гел галачиз квахьнавай аскер Кьади Мегьамедован вахарихъ галаз гуьруьш кьиле тухвана.

Украинада кьиле физвай махсус серенжемдин иштирак­чидин вахари райондин кьилевайбурувай чпиз яшайишдин жигьетдай са жерге месэлаяр гьялунин карда куьмек гун тIалабна.

Замир Азизова СВО-дин иштиракчийрихъ, абурун мукь­ва-кьилийрихъ авай дердияр гьялун муниципалитетдин администрацияди асул месэлайрикай сад яз гьисабзавайди къейдна ва абуруз куьмек гудайди хиве кьуна.

Къейд ийин хьи, виликдай Кьади Мегьамедоваз РФ-дин Президентдин Указдалди женгера къалурай кьегьалвилерай «Дирибашвиляй» медаль ганай.

Токди яна

Кьурагь райондин Хуьрехуьруьн мулкара кьакьан шалманрилай фенвай ток авай сим агъуз аватна, куьрс хьанвай. Нетижада чуьлда авай 33 мал дуьшуьшдай гьа симина акьуна, токди яна, гиликьна.

Кьурагь райондин администрациядин пресс-къуллугъди хабар гузвайвал, маларин иесияр Хуьрехуьруьн агьалияр я. Алатай гьафтеда абурухъ галаз муниципалитетдин кьил Замир Азизовани Кьурагьрин хуьруьн администрациядин кьил Надир Бабаева гуьруьш кьиле тухвана. Алай вахтунда герек тир чарар-цIарар, документар гьазурна, жавабдар идарайрив агакьарнава.

ЦIинин йис гзаф къати марфар, гарар авайди я. Саки­ гьар вацра къати марфар къунин, гарар акъатунин нетижада рекьер муькъвер чкIизва, токдин симерин шалманар ярх жезва, маса хаталу гьалар арадал къвезва. Ихьтин шартIара иллаки чпелай токдин симер фенвай шалманрин патарив гьамиша мукъаят хьана кIанда.

* * *

Кьурагь районда токди ягъай мад са дуьшуьш арадал атана. 29-июлдиз нянин сятдин 5-далай кьулухъ Хпуькьрин хуьряй тир 13 йис хьанвай Фатима токдин симер фенвай ярх хьанвай шалмандал алай кьатI хьанвай симина акьуна токди яна. И арада аялди вичин таяр-туьшерихъ галаз данаяр хутахзавай.

Муниципалитетдин администрациядин пресс-къуллугъ­ди хабар гузвайвал, шалман къати марфар къунин нетижада ярх хьана.

Дуьшуьш арадал атанвай чкадин патав векь язавай агьалидиз аял токди янавайди акуна. Ада гьасятда аялдиз сифте куьмек гана. Гуьгъуьнлай Фатима Кьурагь райондин кьилин духтурханадиз агакьарна. Адан капашризни кIвачин кIанериз куникди кьвед лагьай дережадин хирер акъатна. Аял духтуррин гуьзчивилик ква, адан сагъламвал патал хаталувал авач.

ЦIийикIа туьхкIуьрзава

29-июлдиз РД-дин Гьукуматдин Председатель Мегьа­мед Рамазанов Мегьарамдхуьруьн райондиз мугьман хьана. Ина республикадин премьер-министр Россиядин государстводин сергьятдилай машинар элячIун патал кардик­ кутунвай «Тагьирхуьруьн-Къазмаяр» пункт цIийикIа туькIуьр хъийизвай гьалдихъ галаз таниш хьана ва цIийи хъувунвай «Ярагъ-Къазмаяр» пункт авай гьалдиз килигна.

М.Рамазановахъ галаз цIийикIа туькIуьр хъувунин кIва­лахар кьиле физвай гьал «Росгранстрой» ФГКУ-дин регьбердин заместитель Камил Гьалимовани ахтармишна.

Къейд ийин хьи, Азербайжандихъ галаз авай сергьятдал алай и пунктунай улакьрин международный дережадин «Север-Юг» дегьлиз физва. Пар чIугвадай машинрин алакъа ина 2022-йисалай кардик кутунва. Алай вахтунда гьар юкъуз пунктунилай юкьван гьисабдалди пар чIугвадай 230 машин элячIзава.

Проект кьилиз акъудун патал «Гефест» ООО-дихъ галаз икьрар кутIуннава. Карханадин векилри Гьукуматдин Председателдиз проект кьилиз акъудзавай гьалдикай малуматар гана. Малум хьайивал, цIийикIа туькIуьр хъувунин кIвалахар 2028-йисан кьуд лагьай кварталда акьалтIарун фикирдиз къачунва.

КIвалахар тамамарайдалай кьулухъ пунктунилай йи­къан­ къене юкьван гьисабдалди саки 2360 машиндивай (абурукай тахминан 1100 пар чIугвадайбур) элячIиз жеда. Улакьрин гьерекатдин полосайрин кьадар 8-далай 20-дал кьван артухарзава. Ихьтин шартIара машинар государстводин сергьятдилай элячIун патал акъатзавай вахт хейлин тIимил жеда.

Мегьамед Рамазанова проект кьилиз акъудунихъ Да­гъус­тандихъ транспортдинни логистикадин рекьяй авай мум­кинвилер вилик тухунин карда стратегиядин метлеб авайди къейдна.

Ахцегь районда

Давам жезва

Чна виликдайни хабар гайивал, Ахцегьрин хуьре сад-садан гуьгъуьналлаз куьчеяр, цIийикIа туькIуьр хъийиз, аваданлу ийизва. Чкадин агьалийрин яшайишдин шартIар хъсанарунин мураддалди кьиле тухузвай и кIвалахар давам жезва.

«Лезги газетдиз» Ахцегь райондин администрациядин пресс-къуллугъди хабар гайивал, алай вахтунда кIвалахар генерал-майор Рамзес Набиеван тIварцIихъ галай куьчеда кьиле физва. Пудратчи кархана «Ростехнострой» ООО я. Исятда ина цин турбайрин къурулуш цIийи хъийизва, къир цун патал рехъ къайдадиз гъизва.

Малум хьайивал, куьчеда кьиле тухузвай кIвалахар райондин кьилевайбуру чпин гуьзчивилик кутунва. ЦIийи хъувурдалай кьулухъ генерал-майордин тIварцIихъ галай куьчеда гьам улакьрин гьерекат, гьамни ина яшамиш жезвай агьалияр патал къулай шартIар арадал къведа.

Тадаракралди ­таъминарзава

Ахцегь райондин кьил Абдул-Керим Палчаева РД-дин спортдин ва физический культурадин министерстводивай муниципалитетдин мектебриз спортдин тадаракар чара авун тIалабна. Мукьвара райондин мектебрив, федеральный дережадин «Спорт – норма жизни» проектдин сергьят­ра аваз, спортдин тадаракар агакьиз гатIуннава.

Муниципалитетдин администрациядин пресс-къуллугъ­ди хабар гузвайвал, и йикъара спортдин лазим тир алатар СССР-дин Игит Валентин Эмирован тIварцIихъ галай 2-нумрадин юкьван школадив агакьна.

Лагьана кIанда, и мектебда ГТО-дин нормативар вахкудай тадаракар кардик кутун патал райондин администрация­ди махсус майдан арадал гъанва. Гила амайди агакьнавай спортдин тадаракар къайдадик кутуна эцигун я.

ЦIийи кIелунин йисуз Ахцегьрин 2-нумрадин юкьван мектебди аялар спортдин тадаракралди бес кьадарда таъминарнавай майдандал кьабулда.

СтIал Сулейманан районда

Гъавурда туна

Мукьвара соцсетра гьакъикъатдихъ галаз кьан тийизвай малуматар пайда хьунихъ галаз алакъалу яз, СтIал Сулейманан райондин администрацияди къати марфар къунин нетижада чкIай Кьасумхуьруьн 17 тагъдикай ибарат муькъуьз талукь малумат раижна.

РикIел хкин, 28-майдиз, вацIай атай селдиз дурум гуз тахьана, ихтилат физвай муькъуьн тахминан 35-40 метрдин мензилда пуд тагъ михьиз чкIана. И муьгъ неинки са СтIал Сулейманан райондин, гьакIни вири Дагъустандин медениятдин ирсинин надир имарат я, ам Кьасумхуьруьн администрациядин балансдал ала.

Дуьшуьш арадал атай чIавуз райондин кьилевайбуру чкадин агьалийрин хатасузвал хуьн патал муьгъ галай патахъ физвай рехъ тамамдиз агална.

Муниципалитетдин администрацияди хабар гузвайвал,­ ихтилат физвай муьгъ медениятдин ирсинин объект я, гьавиляй адаз талукь яз тухузвай гьар са кIвалах федеральный дережадин къанундал асаслу яз кьиле тухузва. ЦIийикIа туькIуьр хъувунин кIвалахарни РД-дин медениятдин ирсинин объектар хуьнин рекьяй кардик квай Агентстводихъ галаз меслятна тешкилна кIанзава.

Я СтIал Сулейманан райондин кьилевайбуру, я жавабдар маса къуллугърал алайбуру – садани муьгъ цIийикIа туькIуьр хъувун патал акъатзавай харжийрин кьадар садрани лагьанач. Мадни башкъа, муьгъ патал миллиард манат пул кIватIна кIанзава лугьудай ванерни гьакъикъатдихъ галаз кьан тийизвайбур я. Муьгъ хъувуниз, проектдин, эцигунрин кIвалахриз акъатзавай харжияр райондин администрациядин бюджетдай чара ийида – меценатрин ва республикадин кьилевайбурун куьмекдалди. Чкадин агьалийривай и макьсадриз пулдин такьатар садани кIватIзавач. Муниципалитетдин администрацияди халкьдивай ихьтин малуматриз фикир тагун тIалабзава. Муькъуьхъ ва районда кьиле физвай амай вакъиайрихъ галаз алакъалу официальный малуматар чкадин администрациядин такьатриз акъатзава. Бязи блогерри Россиядин къанунралди къадагъа авунвай соцсетра гуя чкадин гьукумди муьгъ арадиз хкун патал са серенжемни кьабулзавач, акси яз, чкадин агьалийривай пулар кIватIзава, кьилдин ксарин техника желбзава лугьуз, чукIурзавай малуматар къалпбур я.

«Тарихдин метлеб авай и имарат къайдадиз хкун чун паталди эвелимжи месэлайрикай сад я. И рекье чна, къанундал асаслу яз, кIвалах тухузва. Объект кьилдин ксарин къуватралди кIан хьайивал туькIуьриз хъжедач. Эцигунрин кIвалахрив, талукь идарайрихъ галаз меслятна, проектдинни сметадин документация гьазурна, пешекарар желбна, гатIунна кIанзава. Дагъустандин Гьукуматдин ва меценат­рин куьмекдалди тайинарнавай вахтунда герек тир вири серенжемар кьабулда, абурулай кьулухъ 17 тагъдикай ибарат къадим муьгъ мад ачух хъжеда», – лагьана райондин кьил Саид Темирханова.

Агьмед Магьмудов