СтIал Сулейманан районда авай Зугьрабахуьр куьгьне хуьрерикай сад я, ам арадал атай вахтни якъиндиз тестикьариз хьанвач. Хуьруьн къадимвилин гьакъиндай сурарин винел алай къванерал авунвай кхьинри, чапхунчийрихъ, къачагърихъ галаз кьиле тухвай женгерикай малум риваятри шагьидвалзава.
Зугьрабахуьр гзаф чуьллер, цин чешмеяр, тамар авай гуьрчег чка я. Хуьруьн мулкар Мегьарамдхуьруьн, Докъузпара ва Кьурагь районрин чилерихъ галаз авай часпардал ацалтзава. НикIери, багълари, чуьллери, уьруьшри санлай 650 гектардин майдан кьунва.
Хуьре ХVIII асирдин мискIин ава. Зугьрабахуьре сифтегьан юкьван асиррин девирдиз талукь хьилен кIуфал гьалддай ромбдин кIалубда авай, ракьун кьулу 2 алат жагъана.
1886-йисан переписдин делилралди, Зугьрабахуьре 80 майишат ва 452 кас (211 итим ва 241 дишегьли) авай.
Чи йикъара ина саки 100-дав агакьна кIвалер ава. Интернетдин чешмейра къалурнавайвал, исятда хуьре 400-дав агакьна агьалияр яшамиш жезва. Хуьр Шихидхуьруьн администрациядик акатзава.
Мурад Мегьамедкеримован
«СтIал Сулейманан район: тарихдин гелерай» ктабдай.
