Агъа Хъартас. СтIал Сулейманан райондин къадим хуьрерикай сад. Хуьруьнвийри «Хъартас» тIвар Туьркияда авай Хъарс (Карс) шегьердихъ галаз алакъалу ийизва. 1930-йисара и хуьре колхоз тешкилна, сифтегьан классрин мектеб кардик кутуна.

1966-йисуз хьайи залзаладилай гуьгъуьниз хъартасвийрин са пай Мегьарамдхуьруьн райондин Советский хуьруьз куьч хьана, муькуь пай – Кьасумхуьрел (ЦIийи поселокдиз). 1970-йисан делилралди, Агъа Хъартасрин хуьре 91 майишат ва 398 инсан амай. Чкадин агьалияр лежбервилел, малдарвилел машгъул жезвай.

1886-йисан переписдин делилралди, хуьре 96 кIвал, 502 агьали (250 итим ва 252 дишегьли) авай.

Эхиримжи йисара Агъа Хъартасрин хуьре 51 кIвал, 200-далай виниз агьалияр ава. Хуьре тамам тушир юкьван мектеб, медпункт ва медениятдин кIвал кардик ква. Хуьр Уллу-Гъетягърин хуьруьн администрациядик акатзава.

Мурад Мегьамедкеримован «СтIал Сулейманан район: ­тарихдин гелерай» ктабдай.