КIахцугъ. СтIал Сулейманан ва Кьурагь районрин часпардал алай КIахцугърин тIварцIикайни хуьр арадал атай вахтуникай якъин малуматар авач. КIахцугъ патарив гвай дагълух гъвечIи ирид хуьруькай арадал атайди яз гьисабзава: Кьунча, Хъчарихъ, СтIалдихъ ва масабур.
Хуьруьн рагъэкъечIдай патан паюна сурар ва Мугьамедханан хва Молла Маммадин мавзолей, хуьруьн центрада мискIин ава. Хуьруьн кефер ва кьибле патарани сурар ава. Виликан СтIалдихъ хуьруьз мукьва мулкара Алпан девирдин сурарин кьилихъ жедай къванер жагъанва. Халкьдин арада абур эрменийрин сурар яз малум я.
КIахцугъвияр малдарвилел, хуьруьн майишатдал, багъманчивилел машгъул хьана. Кеспи авун патал агьалияр шегьерризни физ-хквезвай. 1886-йисан переписдин делилралди, хуьре 93 майишат ва 441 агьали авай. Абурукай 221 итимар тир, 220 — дишегьлияр. Чи йикъара хуьре 195 майишат ава ва саки 700 агьали яшамиш жезва. Хуьр Кьасумхуьруьн администрациядик акатзава.
Мурад Мегьамедкеримован «СтIал Сулейманан район: тарихдин гелерай» ктабдай.
