СтIал Сулейманан райондин Ичинрин хуьр арадал атай вахт пешекарри малум туш лугьузватIани, хуьруьн тIварцIин мана ачухун четин туш: ичин — «яблочный», ичерин чка, ичер авай чка.
Хуьр райондин центр тир Кьасумхуьруьвай рагъэкъечIдай патахъ 14 километрдин яргъа, ИчинвацIун чапла къерехда, экIя хьанва. Ана ихьтин тухумар ава: Алихаяр, Гьургьурар, ДаркIушар, Рустамбур, Суварар, Мишеяр, Япашар.
1886-йисан переписдин делилралди, хуьре 86 майишат ва 487 инсан авай. Абурукай 258 итимар тир, 229 — дишегьлияр.
Чи йикъара хуьре яшамиш жезвай агьалийрин кьадар хейлин тIимил хьанва: 54 кIвал авай хуьруьн жемят 288 касдикай ибарат я.
Ичинрин хуьр Цмуррин хуьруьн администрациядик акатзава.
Мурад Мегьамедкеримован
«СтIал Сулейманан район: тарихдин гелерай» ктабдай.
