Гьуьрметлу газет кIелзавайбур!
“Лезги газетдин” редакцияди “Лезги хуьрер” тIвар алай рубрика ачухзавайдакай хабар гузва. Малум тирвал, Лезгистан къадим тарих, хъсан адетар авай, бубайрин ирс хуьзвай хейлин хуьрералди девлетлу я. Гьайиф хьи, дагълара авай гзаф хуьрер харапIайриз элкъвенва. Амма чна абур рикIелай алудна виже къведач: хуьрерин тарих чирун, адетар хуьн ва саламатдиз гележегдин несилрални агакьарун, бубайрин чилерин иесивал авун, куьгьне хуьрерал чан хкун чи виридан буржи я. “Лезги хуьрер” рубрика кардик кутунин макьсадарни гьа ибур я.
Чна газет кIелзавайбурулай чпин хуьрерикай кхьенвай макъалаяр вилив хуьда. Анжах бязи шартIариз фикир гана кIан жеда. “Лезги хуьрер” рубрика патал гьазурзавай макъалаяр басма авунвай чарни зуралай артух хьун лазим туш. Макъалада куьрелди хуьр мус ва гьикI арадал атанатIа, алай вахтунда хуьре шумуд майишат аватIа, агьалийрин кьадар гьикьван ятIа, Ватандин ЧIехи дяведа иштиракайбурун кьадар, къунши хуьрер гьибур ятIа, исятда хуьруьхъ вири жемятдиз талукь гьихьтин дердияр аватIа, хуьряй машгьур гьихьтин инсанар акъатнаватIа ва итижлу маса делилар къалурна кIанда. Куьгьне хуьрерикай (алай вахтунда касни амачир) кхьидайла, винидихъ ганвай делилрилай гъейри, хуьр мус ва гьихьтин себебралди куьч хьанатIа къейд авун герек я. Макъаладихъ галаз, аваз хьайитIа, хуьруьн шикилни рекье тваз жеда.
Азербайжанда авай чи хуьрерикайни кхьиниз эвер гузва. Анрайни “Лезги газетдихъ” галаз алакъаяр хуьдай авторар хьайитIа, чун пара шад жеда. Дагъустандилай къецепата авай ватанэгьлийрихъ чи газет lezgigazet.ru сайтдай кIелдай мумкинвал ава.
«Лезги газет»
