КьепIир Айисат
(1875 – 1901)
Руша гъвечIи чIавалай чIалар теснифдай, абур манидалди лугьудай. Адан гзаф эсерар («Лагь тIун, яр», «Гьарун катай ван хьайила», «Ярдин суракьда», «Хтай ярдиз» ва масабур) рушанни хуьруьнви Агъабеган хва Гьарунан арада куькIвей муьгьуьббатдикай я. КIалубдал гьалтайла, Айисатан манияр халкьдин сивин яратмишунрин къайдада туькIуьрнавай бейтер я.
Сифте яз КьепIир Айисатан эсерар Д. Бейбалаева ва Ш. Исаева кIватI хъувуна, 1970-йисуз «Коммунист» газетдиз акъудна.
1980-йисуз Абумуслим Агъаеван «КьепIир Айисат» повесть «Дуствал» альманахдиз акъатна. Гуьгъуьнлай С. Рамазанова мадни Айисатан шиирар жагъурна, адакай повесть, пьеса ва роман кхьена. 2014-йисуз «КьепIир Айисатан манияр» кIватIал кIелзавайбурув агакьна.
Кьуд эсер композитор Мавлудин Хийирова музыкадал эцигна. 2000-йисуз Лезги театрди «КьепIир Айисат» драма къалурна. Художник А. Ризаева шаир рушан портрет арадал гъана.
