20-апрелдиз «Лезги газетдин» редакцияди, мергьяматлувилин «ЛЕКИ» фондуни ва ФЛНКА-ди СтIал Сулейманан райондин Эминхуьре лезги чIалайни эдебиятдай гегьенш олимпиада кьиле тухуда.

Гьар йисуз тешкилзавай акъажунра, алатай йисара хьиз, цIини Дагъустандин мектебрин 10-классра кIелзавайбуру иштиракда. Гьар мектебдай анжах са аялдиз олимпиадада иштиракдай ихтияр ава.

Олимпиададин нетижаяр жюридин векилри гьа юкъуз кьада ва тафаватлу хьайи ученикризни абурун муаллимриз пулунин пишкешар, дипломар  гуда. Кьилди къачуртIа, ученикар патал тешкилатчийри цIи пишкешдин 15 чка тайинарнава: 1-чкадай 30 агъзур манат гуда, 2-чкадай – 25 агъзур, 3-чкадай – 20 агъзур, 4-чкадай – 18 агъзур, 5-чкадай – 16 агъзур, 6-чкадай – 14 агъзур, 7-чкадай – 12 агъзур, 8-чкадай – 10 агъзур, 9-чкадай – 8 агъзур, 10-чкадай – 6 агъзур, 11-15-чкайрай – гьардаз 5 агъзур. Пулунин пишкешрилай гъейри, гъалибчийрин арада хьайибурув лезги писателрин ктабар, савкьатар агакьда.

1-чка кьур ученикдин муаллимдиз 10 агъзур манат гуда, 2-чка кьур ученикдин муаллимдиз – 8 агъзур, 3-чка кьур ученикдин муаллимдиз – 6 агъзур, амай 12 муаллимдиз – гьардаз 5 агъзур манат.

Олимпиада сятдин 10-даз гатIунда. Сятдин 9-далай иштиракчияр регистрация ийида.

Мектебда вири иштиракчияр патал нисинин тIуьн тешкилда.

Тешкилатчияр