Лезги ашукьди гьейранарна
Дагъустандин медениятдин лайихлу къуллугъчи, республикадин Гьукуматдин «Дагъустандин руьгь» премиядин сагьиб, сейли ашукь Айдун Мегьамедовакай «Мир Сибири» лишандик кваз кьиле фейи милли манийринни сеняткарвилерин международный дережадин фестивалдин лауреат хьана. Идакай «Лезги газетдиз» Республикадин халкьдин яратмишунрин кIвалин пресс-къуллугъди хабар гана.
Медениятдин сувар 9-12-июлдиз Красноярскдин крайдин Шушенское поселокда 22-сеферда кьиле фена. РФ-дин къецепатан крарин министерстводин куьмекдалди тешкилай и мярекат Россиядин халкьарин садвилин йисан сергьятра аваз тухузвай мярекатрин программадик квай. Фестивалда 83 касди иштиракна.
Бине Ахцегь райондин Фиярин хуьряй тир лезгийрин машгьур ашукь Ширинан хва ашукь Айдуна фестивалда РД-дин медениятдин министерстводин теклифдалди иштиракна. Чуьнгуьр ядай устадди вичин алакьунар «Солист-вокалист-инструменталист» номинацияда къалурна. Ашукьди чуьнгуьрдин симер къугъурай тегьерди, тамамарай манийри фестивалдин иштиракчияр гьейранарна.
РД-дин медениятдин министрдин везифаяр вахтуналди тамамарзавай Зарема Бутаевади милли манидин адетриз кIевелай вафалувал къалурунай – артистдиз ва халкьдин медениятдив къайгъударвилелди эгечIунай, милли манияр, сеняткарвилер хуьник, вилик тухуник лайихлу пай кутунай Мегьарамдхуьруьн райондин администрациядин кьил Нариман Эфендиеваз сагърай лагьана. Ашукь Айдуна алай вахтунда Мегьарамдхуьруьн райондин медениятдин хиле зегьмет чIугвазва.
Республикадин халкьдин яратмишунрин кIвалин директор Марита Мугьадовадин гафаралди, тек са алай йисуз Дагъустандин артистри, патарал физ, уьлкведин ва международный дережада аваз тешкилзавай фестивалра иштиракнава. Ашукь Айдунакай рахайтIа, ада Дагъларин уьлкведин девлетлу меденият республикадилай къеце гзаф майданра ашкара авуна. Вичихъни яратмишунрин рекье тарифдиз лайихлу агалкьунар ава. Виридакай рахун тавуртIани, мисал яз, 2022-йисуз «Культмост. Ярославль. Этно» лишандик кваз кьиле фейи Вирироссиядин фестивалда лезги ашукь Россиядин виридалайни хъсан милли 15 музыкантдикай сад хьана.
«Мир Сибири» фестивалдин кьилин майдандал Россиядин 13 региондай атанвай кьве вишелай виниз артистар экъечIна. Абурукай милли манияр виридалайни хъсандиз, устаддаказ тамамарайбурукай сад чи ватанэгьли ашукь Айдун хьуни нубатдин сеферда Дагъустандин халкьарин манияр искусстводин надир чешмеяр тирди субутна. Къейд ийин хьи, медениятдин суварик атанвай мугьманрин арада Индиядин, Белоруссиядин, Къиргъизиядин, Эрменистандин, Франциядин, Узбекистандин, Колумбиядин ва Китайдин векилар авай.
Агьмед Магьмудов