17-июлдиз мергьяматлувилин «Леки» фондуни Кьурагь райондин КIирийрин хуьре кардик квай «Лекьрен муг» этнолагерда ял язавай аялрихъ галаз спортдин тренировка кьиле тухвана.

И кардал фондунин векилри машгьур тренерар тир Минажудин Къазиев, Мумин Гъаниев, Абдулкерим Гъаниев, абурун гъилик спортдай вердишвилер къачунвай са жерге спортсменар желбнавай.

Тренировка тIебиатдал кьиле фена. Аялри чпихъ спортдин са шумуд жуьредай алакьунар авайди къалурна, турник­рал чене хкажна, гимнастикадин тапшуругъар тамамарна.

Лагьана кIанда, «Леки» фондуни идалай вилик «Лекьрен муг» лагерда азаддиз юкьварар кьунай мастер-класс тешкилнай. Ам спортдин «Самур» школада дзюдодай чирвилер гузвай тренер Абдулла Букаровани адан сухтайри кьиле тухванай.

Къейд ийин хьи, фондунин векилри тренировкадилай кьулухъ мугьманриз ва лагерда ял язавай аялриз хъсан тIуьнарни тешкилнавай. Нянихъ лагердин мулкара кььиле фейи гуьруьшдал тренеррини фондунин векилри аялрив савкьатар вахкана.  

Чи мухбир