Алатай йисуз вичин хъсан суракьар вириниз чкIай «Лекьрен муг» этнолагердин ракIарар алай гатуз аялар патал кьвед лагьай гъилера ахъа жеда. Ам Кьурагь райондин КIирийрин хуьре тIебиатдин гуьлуьшан чкадал алай интернатдин дараматда кардик акатда.
И гъилера лагердиз 8-15 йисарин яшара авай гадаярни рушар кьабулда. Абур паталди кьилди кIватIалар туькIуьрда. Ина пешекарри аялриз лезги чIал, чи халкьдин тарих, адетар мукьувай чирда.
Аялриз балкIанар гьалдай, дегь къугъунрив эгечIдай мумкинвилерни жеда. Рушариз сун гуьлуьтар, халичаяр храз, хьран фу чраз, милли тIуьнар ийиз чирда.
Вахт рикIел аламукьдайвал акъудун патал музейриз ва тIебиатдин иер чкайриз сиягьатар, тIвар-ван авай шаиррихъ, алимрихъ, спортсменрихъ галаз гуьруьшар тешкилда.
Этнолагерди июлдин 1-далай 21-далди кIвалахда. «Лекьрен муказ» куь аялар ракъурун патал вуч авуна кIанзаватIа, квевай, телефондин 8 905 137-74-52 нумрадиз зенг авуна, чириз жеда.
Агьмед Магьмудов
