И мукьвара Ахцегьрин цIийи спорткомплексда азаддаказ кьуршахар кьунай жаванрин арада гьар йисуз кьиле тухузвай «Лекидин Кубок» патал республикадин турнир­ кьиле фена. Адан тешкилат­чияр мергьяматлувилин «Ле­ки» фонд ва Ахцегь райондин администрация тир. Турнирдин гьуьрметлу­ мугьманрин арада райондин кьил Абдул-Керим Палчаев, Россиядин кьуршахар­ кьунай спортдин федерациядин векил Ферзилагь Исламов, Кабардино-Балкариядин кьурша­хар кьунай спортдин федерациядин вице-пре­зидент Мурадин Жемагельдиев, машгьур журналист ва комментатор Степан Крижановский, гьакI машгьур спортсменарни тренерар, спортдин и жуьредал рикI алай хейлин ксар авай.

Турнирдин тешкилатчийри спортдин серенжем кьиле тухуник пай кутур спонсорриз ва амадагриз сагърай лагьана. Абурун арада ава: «AppleYug» туьквен, Т9 кофейняяр, «Риан групп», строймаркет­ «Победа», «Шумтрансавто», «Тэкар Групп» компания, В.С. Гудым, Ф.И. Исламов, М.Ф. Мегьамедкеримов, Е.А. Приходько.

Акъажунра Каспийск, Избербаш, Дербент, Дагъустандин Огни, Къизилюрт шегьеррай, Ахцегь, Рутул, Кьурагь, Мегьарамдхуьруьн, СтIал Сулейманан, Казбек, Дербент, Къарабудахкент, Сергокъала районрай тир командайрик кваз 2011-2012-йисара дидедиз хьанвай жаванри заланвилин са шумуд категориядай чпин устадвал къалурна.

Регина Семедова