Дагъустан Республикадин Кьилин везифаяр вахтуналди тамамарзавайди тир Владимир Васильеван Указдалди республикадин вилик лайихлувилерай, зегьметда къазанмишнавай агалкьунрай ва гзаф йисарин намуслу кIвалахдай Сулейман-Стальский райондин Испикрин хуьруьн культурадинни ял ягъунин центрадин методист Ислеман Ризаеваз “Дагъустан Республикадин культурадин лайихлу работник” гьуьрметдин тIвар ганва.
И.Ризаев 1962-йисуз Сулейман-Стальский райондин Салянрин хуьре дидедиз хьана. 1980-йисан 27-августдилай 1982-йисан 29-июндалди Афгъанистан Республикадиз интернациональный куьмек гунин жигьетдай Советрин кьушунрин тайин тир контингентдин къурулушда аваз женгера иштиракна. Адаз гьукуматдин гзаф шабагьар ава.
1988-йисуз Дагъустандин культпросвет училище акьалтIарай Ислемана культурадин хиле жуьреба-жуьре къуллугърал кIвалахна.
1994-йисалай къенин йикъалди ада Сулейман-Стальский районда кардик квай Афгъанистанда кьиле фейи дяведин ветеранрин Союздин председателдин везифаяр тамамарзава.
Чна Ислеман Ризаеваз и гьуьрметдин тIвар рикIин сидкьидай мубаракзава.
Хазран Касумов
