Курскда машгьур курхуьруьнви
Мисалда лугьузвайвал, гару ягъай пеш хьиз, кьисметди инсан акъуд тийидай чка жедач. Курхуьрел дидедиз хьайи, 15 йиса авай Султанагьмед Султанагьмедова Буйнакскда школада кIелзавай. А чIавуз хьайи залзалади шегьердиз еке зарар гана, гзаф дараматар, гьа жергедай яз Султанагьмеда кIелзавай школани чкIана. Школьникрин дестедик кваз С. Султанагьмедова кIелунар Курск шегьердин 2-нумрадин интернатда давамарна.
1975-йисуз лезги гадади машгьур «Динамо» обществодин Курскда кардик квай самбодинни дзюдодин школада тренер Юрий Игоревич Карпован гъилик спортдин и жуьрейрай вердишвилер къачуз башламишна. Агалкьунарни геждалди гуьзлемишдайвал хьанач. 1976-йисуз Султанагьмеда жаванрин арада сифте дзюдодай, гуьгъуьнлай самбодай Курскдин областдин кIвенкIвечивал патал кьиле фейи акъажунра 1-чкаяр кьуна. Гуьгъуьнлай гъалибвилер мадни хьана: 1980-йисуз «Курскдин женгерин Игитрин» Вирисоюздин турнирда дзюдодай 2-чка, 1980-йисуз гьа и турнирда 1-чка кьуна, СССР-дин спортдин мастервилин тIвар къачуна.
1984-йисуз С. Султанагьмедов «Буревестник» обществодин хкянавай командадик кутуна ва кьегьал лезги хцикай УССР-дин кIвенкIвечивал патал акъажунрин гъалибчи хьана.
Курскдин пединститут акьалтIарай 1986-йисуз Султанагьмед Гьажибубаевич Курскдин областдин Солнцев райондиз ракъурна. Ина ада, педагогдин везифаярни кьиле тухуз, гьам спортсмендин, гьамни тренервилин рекьерни давамарна.
Тренервиле кIвалахзавай 49 йисан девирда Султанагьмед Гьажибубаевича самбодай ва дзюдодай спортдин цIудралди мастерар, чIехи турниррин чемпионарни призерар гьазурна. И кар къенин юкъузни давамарзава.
Гьа са вахтунда С. Султанагьмедова вичини ветеранрин арада кьиле тухузвай Вирироссиядин ва международный турнирра иштиракзава, кIвенкIвечи чкаяр кьазва.
Кьилди къачуртIа, ветеранрин арада Ульяновск шегьерда дзюдодай Россиядин чемпионатда иштиракна, 73 килограммдин заланвал авайбурун арада 2-чка кьуна. Султанагьмедоваз медаль ва Россиядин ветеранрин дзюдодин союздин председатель П. Г. Байскийдин къул алай диплом гана.
Гьуьрметлу Султанагьмед Гьажибубаевич, райондин, лезги халкьдин тIвар хкажзавай вахъ педагогвилин, тренервилин кIвалахра ва спортда мадни еке агалкьунар хьурай!
Хазран Кьасумов