Къуръандин 32-сурадин 27-аятдин тафсир
РикIел гъун
Къуръандин 32-сурадин 27-аятдин тафсир:
Бес акунвачни (а) кьиникьилай кьулухъ чан хкун таб яз кьунвайбуруз гьакъикъатда Чна яд (марф) гьалзавайди кьуранвай, векъи (къалин) чилел, виче набатат авачир, (ахпа) адалди (а марфадалди) Чна акъудзавайди гьар жуьре рангарин къацар (набататар): адакай абурун мал-лапагдини (гьайванрини) незва ва чпини ам тIуьн (рузи) яз ишлемишзава, чпин беденар патал, адалди чеб яшамиш жез?!
Бес абуруз аквазвачни а няметар чпин вилералди – адалди чир жедайвал (абуруз): гьакъикъатда Аллагь, Вичи а крар ийизвай, къудратлу тирди чан хкунал кьейибурал (мейитрал) ва абур цIийиз халкь хъувунал абурун сурарай?!
«Регьят тафсир», араб чIалай таржума авурди – диндин алим Ямин гьажи Луткунви.
Са гьадис
Гьадисда къейднава (мана): «Чпихъ галаз Къияматдин юкъуз Аллагь рахан тийидай пуд (жуьре) ксар ава, абур Ада михьини ийидач ва абуруз (Ам) килигни ийидач. Абуруз азиятар, азабар жеда. Абурук зина авур кьуьзуь кас, тапарарзавай пачагь ва такабурлу кесиб акатзава» (Абу-Давуд).
__________________
«Зина» - прелюбодеяние
Араб чIалай таржума авурди – Ямин гьажи Луткунви
Имам аш-Шафииди лагьай гафар
– Ар-Рабиъ алимди агакьарнавайвал, адаз имам аш-Шафииди икI лугьудайла ван хьана: «Квез зи ктабрай Пайгъамбардин (къуй Аллагьдин патай салават ва саламар хьурай вичиз) Суннадиз акси шейэр жагъайтIа, куьне Суннада авай гафар лагь, зи гафар тур (гадара)».
– Юнус ибн Абдул-Аъля алимди лугьузва: «Заз имам аш-Шафииди лагьана: Я Юнус! Инсанрикай гъил чуькьуьн (абуруз мискьивалун) мидявал (адават) къазанмишдай кар я ва абуруз михьиз гъил ахъаюн пис юлдашар желбдай кар я. Гьавиляй вун а кьве гьалдин арада хьухь!».
– Имам аш-Шафииди лагьана: «Инсанрин разивал (абур валай рази хьун) агакь тийидай сергьят я! Абурукай саламатвиле жедай са рехъни авач. Гьавиляй вал алайди ваз менфят авай кар авун я, гьа рехъ кьуна вач!»
(«Пайгъамбаррин варисар» ктабдай, Я. Мегьамедов)