(Эвел – 2022-йисан 16, 18-19, 26, 32, 38-39, 44, 52, 2023-йисан 4, 9-нумрайра)

«Истихара» кпIунал кIелдай дуьа

…Пайгъамбарди (Аллагьдин патай салават ва салам хьуй вичиз) лагьанва (мана): «Квекай садаз са кар герек хьайила (ам ийидай къаст, ният авурла), къуй ада кьве кьил ферз тушир («истихарадин» суннат) капI авурай ва ахпа ада лугьурай: «Алла́гьумма ин­ни́ астахи́рука би-и́льмика ва астакъди­рука би-къудратика ва асъалюка мин фазликаль-гIази́м, фа-иннака такъдиру­­ ва ла́ акъдиру ва тагIламу ва ла́ агIламу ва анта гIалла́муль-гъуййу́б. Алла́гьумма ин кунта тагIламу анна гьа́заль-амра - (инал вичин рикIе авай кар лугьуда) - хайрун ли́ фи́ ди́ни́ ва магIа́ши́ ва гIа́къибати амри́ (ва я: фи́ гIа́жили амри́ ва а́жилигьи) факъдургьу ли́ ва йассиргьу ли́ сумма ба́рик ли́ фи́гьи. Ва ин кунта тагIламу анна гьа́заль-амра шаррун ли́ фи ди́ни́ ва магIа́ши́ ва гIа́къибати амри́ (ва я: фи гIа́жили амри́ ва а́жилигьи) фасрифгьу, гIанни́ васрифни́ гIангьу вакъдур лийаль-хайра гь́айсу ка́на, сумма арзини́ бигьи».

Я Аллагь! Гьакъикъатда, за Вавай­ Вуна Ви чирвилелди заз хкягъун, Ви къудратлувиликай заз къуват гун, Ви зурба регьимдикай гун тIалабзава. Гьакъикъатда, Вун гьар са кардал къуд­ратлу я (Валай вири крар алакьда), захъ гьич къуват авач (залай алакьдач),  Ваз вири крар чизва, заз - гьич чизвач. Вун вири «гъайб» крар (чинебан крар, сирер, чуьнуьх тир крар, гележег) Чидайди я! Я Аллагь! Эгер Ваз чизватIа (гьелбетда, Ваз ам чизва), дугъриданни, (зи) и кIва­лах - (инал рикIевай мурад, кIвалах лагьа­на кIанда: месела, флан рушал эвленмиш хьун) заз зи диндин, яшайишдин ва и кIвалахдин крара хийирлу ятIа, Вуна заз а кар кьисмет-кьадар, кьезилар ва берекатлу ая! Эгер Ваз чизватIа (гьелбетда, Ваз ам чизва), дугъ­ридан­ни, а кIвалах зун паталди пис (зиян)­ ятIа - зи диндин, яшайишдин ва и кIвалахдин крар, Вуна а кар залай алуд (къакъуд), Вуна зун а кардикай яргъа ая (къакъуд), Вуна заз хийирлу кар кьисмет-кьадар ая, гьикI хьайитIани, ахпа Вуна зун а кардал  рази ая» (Бухарий).

Вичин Халикьдивай вичиз хийир авай кар хкягъун тIалабайди гьич пашман жедач. Аллагьди лагьанва (3-сура, 159-аят, мана): «Меслят (мешвера) ая вуна абурухъ галаз герек крара,  (мешверадилай гуьгъуьниз) (вуна) кьетI авурла (са кар), Аллагьдал «таваккул» (кIеви умуд) ая». 

Экуьнахъ ва нянихъ кIелдай дуьаяр (зикрияр)

Аль-гьамду лиллягьи вахIдагьу, ва ссалату ва ссаламу гIала ман ля набиййа багIдагьу.

(Вири) гьямд хьуй Сад Аллагьдиз, тек са Адаз, салават ва салам хьуй вичелай гуьгъуьниз пайгъамбар техжезвайдаз (яни -  Мугьаммадаз).     

Анас асгьабди (Аллагь рази хьурай вичелай) чи Пайгъамбардилай (Аллагьдин патай салават ва салам хьуй вичиз) агакьарнавай гьадисда лагьанва (мана): «Заз чпи Аллагь-Таала рикIел ва мецел гъизвай ксарихъ (жемятдихъ) галаз ацукьун - экуьн кпIунилай та рагъ экъечIдалди - гзаф кIан я - за Исмаилан эвледрикай кьуд касдиз  азадвал гунилай. Заз чпи Аллагь-Таала рикIел ва мецел гъизвай ксарихъ галаз ацукьун - рагъдан кпIунилай та рагъ акIидалди - гзаф кIан я - за кьуд касдиз азадвал гунилай» (Абу Давуд).

Гьазурайди – Ямин  Мегьамедов, ­диндин алим

(КьатI ама)