Информациядин «Дагъустан» агентст­вода «Гьахълу Россия» партиядин региондин отделенидин векилри пресс-конференция кьиле тухвана. Суьгьбет зегьметчийрин мажиб­риз ва пенсийриз талукьди тир.

Региондин отделенидин регьбер, РД-дин Халкьдин Собранидин Председателдин заместитель Камил Давдиева Россиядин статистикадин управлениди да­гъустанвийрин мажибриз ва пенсийриз талукь яз гъизвай рекъемар шаклубур тирдакай малумарна.

– Росстатдин делилралди, республикада зегьметчийрив юкьван гьисабдалди гьар вацра 52 агъзур манат агакьзава, – лагьана К. Давдиева. – Амма чи инсанриз ихьтин рекъемрикай ихтилат авурла, абур мягьтел жезва ва абуру гьахълу суал гузва: гьар вацра 52 агъзур манат пул агакьзавайбур вужар я? Гьайиф хьи, и суалдиз жаваб гудай ксар авач. Росстатдин рекъемарни бюджетдин идарайра, майишатра, хейлин карханайра, компанийра, фирмайра кIвалахзавайбуруз гьакъикъи­даказ къвезвай мажибрихъ галаз кьазвайбур туш. Ахьтин рекъемар гьинай ва гьикI арадал къвезвайбур ятIа, лугьузни жедач.

Республикадин профсоюзрини, чи де­­пу­­татрини, жергедин инсанрини­, об­щест­венный­­ деятелрини и месэ­ла са шумудра къа­ра­гъарна: Дагъустандин агьалийрин­ мажи­бар­ вучиз гъвечIибур жезвайди­ я? Ме­гер­­ абуру, Москвадин, Санкт-Петер­­­бургдин­­, Рос­­тов­­­­дин, Нальчикдин къул­лугъ­чий­ри хьиз чпин къуллугъдин, пе­шедин­ везифаяр гьа­къисагъвилелди кьилиз акъуд­за­вач­ни? Тамамарзава. Бес вучиз­­ мажибрин арада еке фаркь ава? Уьл­­кведин вири агьалияр­, гьар са хиле­ кIва­лахзавай пешекаррин ма­жибарни­ сад хьун лазим я. Амма чи уьл­кве­да гьеле гьар са регионда вичин къанунар, мажиб­рин кьадарар ава. Им, гьелбетда­, дуьз туш. Яшамиш­ жезвай чкадилай аслу­ ту­шиз чIугвазвай зегьметдай виридав сад хьтин кьадарда аваз гьа­къи агакьарна­ кIан­да. Мажибрин арада фаркь хьайила­, яшайишдин жигьетдайни садбур бал­кIандал жезва, масадбур яхдиз финиз мажбур жезва.

Ихьтин гьал фикирда кьуна, «Гьахълу Россия» партияди РФ-дин Госдумадив тес­тикьарун патал са шумуд закондин проект вуганва. Абура къейднавайвал, зегьметчидин агъа кIанин мажибдин­ кьадар 60 агъзур манат хьун лазим я. Гьар йисан эхирдай­ кIвалахзавайбуруз 13-мажибни гун герек я. Алай вахтуни уьлкведин ВВП-да зегьметдин гьакъидин фондунин пай хкажун исте­мишзава. Партия­ инанмиш я хьи, пенсия тайинардайла, касдиз адан мажибдин­ 40 процент гун лазим я. Алай вахтунда ла­гьайтIа, пенсий­рин фондуни мажибдин 23,6 процент гузва. Гьа са вахтунда чпин вири­ уьмуьр зегьмет чIугваз акъудай инсанриз­ 13-пенсия гайитIа, мадни хъсан жеда. Пенсияр гьар кварталда индексация авуна кIанда.

Дагъвийрин яшайишдин месэлайрикай, региондин экономика вилик тухуникай РД-дин Халкьдин Собранидин депутат, жемиятдин «Рекьин тийидай полк» тешкилатдин регьбер Марат Алиярова вичин фикирар ачухна.

– Яшайишдин хел, пайи-паярна, амукь­­­завай такьатралди финансламишза­­­вай къайдадин экономикадихъ хъсан нетижаяр жедайди туш, – лагьана М.  Алия­ро­ва. – Чаз яшайишдин хел вилик­ ту­хуниз куьмек гудай экономикадин цIийи жуьре­ (модель) герек я. Халкьдин ма­йи­шатдин­ вири хилера цIийивилер твадай вахт атанва. Савадлу, виниз тир пешекарвилин иесиди хъсан мажибни къачун лазим я. Гьайиф хьи, республикада гилани куьгьне къайдайрал амалзава. ГъвечIи мажиб агакьзавай пешекарди, вичин вири чирвилер, устадвал кIвалахдиз бажагьат серфда. Зегьметдиз килигай гьакъи тагузвай чкада производствони виликди тухуз жедайди туш. Зун кIвалахдин юлдаш Камил Мегьамедовичан веревирдерихъ галаз тамамвилелди рази я. Эгер дагъустанвияр уьлкведин агьалияр ятIа, абурув арада са фаркьни авачир барабар мажибарни агакьарна кIанда.

Пресс-конференциядал «дидейрин ма­­жибдикайни» ихтилат кватна. Сиясат­дин­­ «Гьахълу Россия» партиядин регион­дин отделенидин аппаратдин регьбер Зурида Валиевади лагьана: «Гьар са ди­­деди суткада 24 сятда кIвалахзава ла­гьайтIа, зун ягъалмиш жедач. Зунни­ диде я. Заз аквазва, кIвалахдик квачирбур кIвале гьакI ацукьзавач, абур аялар азаррикай хуьн, абуруз тербия гун патал духтурризни, педагогризни, психологризни, тербиячийризни элкъвезва. Гьар юкъуз икI чIугвазвай зегьметдай государ­стводи дидейриз са кепекни гузвач. Гьа са вахтунда, бицIи аялдихъ гелкъвезвай­ вахт зегьметдин стаждикни кутазвач. Пен­сия­диз талукь балларни аялдин йисни зур же­далди эхлязава. Гьелбетда, ихьтин шар­тIара пенсия екеди жедач. Уьлкведин демографиядин гьалар хъсанариз кIан­заватIа, гьукуматди за къарагъарзавай хьтин месэлаяр гьялун лазим я».

Журналистрихъ галаз хьайи гуьруьшдал зегьметчияр пенсиядиз фидай вахтуникайни ихтилат фена. «Гьахълу Россия» партияди Госдумадиз и месэладин патахъайни закондин проект вуганва. Ана къейдзавайвал, Россияда гзаф итимар 65 йисав агакьдалди рагьметдиз физва. Гьавиляй пенсия тайинарзавай вахт виликдай авайдал хкана кIанда, итимар – 60, дишегьлияр 55 йис тамам хьайила пенсия­диз фидайвал.

Пресс-конференциядал къарагъарна­вай месэлаяр хцибур, важиблубур тир. Журналистри мугьманриз хейлин суаларни гана.

Дагъустанвийрин мажибар артухару­низ талукь гафар лугьуз хейлин вахт я. И гафар пулариз элкъведай вахт мус къве­датIа яраб!?

Абад  Азадов