Дагъустан Республикадин Кьилин везифаяр вахтуналди тамамарзавай Владимир Васильев РФ-дин образованидин ва илимдин министрдин заместитель, Рособрнадзордин регьбер Сергей Кравцовахъ галаз гуьруьшмиш хьана.

Региондиз атунай ва ина са жерге мярекатра иштиракунай федеральный дережадин регьбердиз сагърай лагьайдалай кьулухъ ада республикадин образованидин хиле хьанвай дегишвилерикай суьгьбетна.

— РФ-дин образованидин ва илимдин министрдихъ галаз меслят хьайидалай кьулухъ Дагъустан Республикадин Гьу­ку­­матдин вице-премьервиле — РД-дин обра­зованидин ва илимдин министрвиле Уммупазил Омарова тайинарнава. Алай вах­­тунда адаз, цIийи регьбердиз, кIва­лахдин пландив дуьз эгечIун важиблу я. Сифте нубатда чаз тешкиллувилин­ ва методикадин куьмек герекзава, вучиз­ ла­гьай­тIа территориальный къурулушри  амалзавай  РФ-дин  образованидин ва  илимдин  министерстводин  ре­кьяй­  тир  са  жерге программаяр, тапшуру­гъар ава, —  ла­­гьана В.Васильева ва рес­публикада ЕГЭ хъсанарун патал Рос­­обрнадзорди ту­хузвай кIва­лах­дин важиблувал къейдна.

Гуьруьшдин сергьятра аваз Сергей Кравцова образованидин къурулуш виликди тухунин мураддалди региондиз куьмек гунин фикирар авайди лагьана.

— Чна чи патай герек куьмек гуда, шко­ладилай виликан образование, школадин образование, вузар, ссузар галай-галайвал вилик тухунин кIвалахрин программа жеда, — къейдна ада ва вири ме­сэлаяр саналди, комплекснидаказ гьялдайди алава хъувуна.

РД-дин Кьилин ва Гьукуматдин Администрациядин пресс-къуллугъ