Куьмекар гунай
Кьурагь райондин кьил Замир Азизоваз Украинада кьиле физвай махсус серенжемда иштиракзавай аскерриз куьмекар гунай РФ-дин Яракьлу къуватрин 71609-нумрадин кьушунрин частунин командованиди чухсагъул малумарнава. Идакай «Лезги газетдиз» муниципалитетдин администрациядин пресс-къуллугъди хабар гана.
10-августдиз чкадин администрацияда Замир Азизова 18-армиядин алакъадин штабдин кар алай пунктунин начальникдин заместитель Къужабег Агъагуьловахъ галаз гуьруьш кьиле тухвана. Адан сергьятра аваз райондин регьбердив винидихъ тIвар кьур кьушунрин частунин командир, полковник В. Баслакан къул алай Разивилин чар вахкана.
Ана къейднавайвал, Кьурагь райондин администрацияди СВО кьиле физвай зонадиз ара-ара яшайишда герек къведай затIар, недай-хъвадай суьрсет, алукIдай пек-партал ва маса затIар рекье твазва. Серенжемда иштиракзавай аскеррин гьакъиндай ихьтин къайгъударвал авуни, са шакни алачиз, абурук руьгь кутазва ва гъалибвал мукьва ийиз куьмекзава.
Гаф кватай чкадал лагьана кIанда, Замир Азизова Украинада кьиле физвай серенжемдин иштиракчийриз, абурун хизанриз кьетIен фикир гузва, абур мукьвал-мукьвал кьабулзава, абурухъ авай дерди-баладикай хабар кьазва. Нубатдин ихьтин гуьруьш райондин кьили 10-августдиз Моллакент хуьряй тир старший лейтенант, СВО-дин иштиракчи Альберт Алиевахъ галаз кьиле тухвана. Офицерди женгер кьиле физвай гьаларикай, аскеррин къайгъуйрикай ихтилатарна, СВО-дин зонадиз куьмекар гунай Замир Азизоваз сагърай лагьана.
Вичин нубатда райондин регьберди Ватан хуьзвайбуруз, абурун хизанриз вири рекьерай алакьдай куьмекар гун чкадин гьукум патал кар алай месэлайрикай сад тирди къейдна.
Агьмед Магьмудов