25-февралдиз Москвада РФ-дин хуьруьн майишатдин министр Оксана Лута Дагъустандин Гьукуматдин Председатель Абдулмуслим Абдулмуслимовахъ галаз гуьруьш кьиле тухвана. Идакай «Лезги газетдиз» РД-дин Гьукуматдин пресс-къуллугъди хабар гана.

Гуьруьшдал абуру Кеферпатан Кавказдин республикадин АПК-дин кар алай хилер вилик тухунин месэлаяр веревирдна. Ихтилат сифте нубатда ципицIчивилин, малдарвилин хилерикай, прунз цазвай майданар артухаруникай, хуьруьн майишатдин хел пешекарралди таъминаруникай, регионди «Технологическое обеспечение продовольственной безопасности» милли проект кьилиз акъудунин карда иштиракуникай физва.

Дагъустандиз датIана куьмекар гунай   А. Абдулмуслимова Оксана Лутаз рес­пуб­ли­ка­дин Кьил Сергей Меликован тIвар­цIи­­хъай сагърай лагьана ва 2024-йисуз хуьруьн майи­шатдин хиле хьанвай агалкьунрикай ихтилатна. Ада гьакIни федеральный дережадин министерстводин регь­бердивай­ республикадин малдарвилин хел вилик тухунин рекье алава куьмек гун тIа­лабна. Кьилди къачуртIа, хуьруьн чкада майишатдал­ маш­гъул жедайбур желб авун патал «земский пешекар» лишандик кваз кьилдин прог­рамма арадал гъун теклифна. Къейд ийин хьи, уьл­кведа «земский духтур», «земский муаллим» программа кардик кваз са шумуд йис я.

Премьер-министрди Оксана Лутахъ галаз кьиле фейи гуьруьшдал Дагъустандин хуьруьн майишатдин, АПК-дин хилериз талукь гьялна кIанзавай мад са шумуд месэла къарагъарна. Абурукай гегьеншдиз РД-дин Гьукуматдин сайтдай кIелиз жеда.

Чи мухбир