Эхиримжи гьафтеда Дагъустандин муниципалитетрин администрацийра, гьукумдин органра бязибур къуллугърикай азаднава, бязибур цIийи къуллугърал тайинарнава.
16-июндиз РД-дин Гьукуматдин Председатель Абдулмуслим Абдулмуслимован къарардалди Марина Алиханова, кIвалахдин рекьяй кутIуннавай икьрардин вахт акьалтIунихъ галаз алакъалу яз, РД-дин тIебиатдин ресурсрин ва экологиядин министрдин статс-секретардин-заместителдин къуллугъдикай азадна.
18-июндиз Сергей Меликован Указдалди Алим Темирбулатов вичел ихтибарнавай везифаяр кьилиз акъуд тавунай Къайтагъ райондин администрациядин кьилин къуллугъдикай азадна. Идалай гъейри, А.Темирбулатовак къанун-къайда хуьдай органри лутувиляй тахсир кутунва. Адан гьакъиндай уголовный дело къарагъарнава ва ам алай йисан 21-июлдалди дустагънава.
19-июндиз Махачкъала шегьердин мэр Юсуп Умавова Дагъустандин Кьил Сергей Меликовавай вич алай къуллугъдикай азадун тIалабна. Сергей Меликова адан тавакъу кьабулна. Республикадин меркездин администрациядин кьиле вахтуналди Жамбулат Салавов тайинарнава. Къейд ийин хьи, Жамбулат Салавова виликдай РД-дин транспортдин ва рекьерин майишатдин министерстводиз регьбервал гузвай. С. Меликован Указдалди Юсуп Умавоваз республикадин вилик лайихлувилерай ва хейлин йисарин гьакъисагъ зегьметдай «Баркаллу зегьметдай» медаль гана.
23-июндиз Абдулмуслим Абдулмуслимован къарардалди Мурад Атаев РД-дин транспортдин ва рекьерин майишатдин министрдин сад лагьай заместителдин къуллугъдикай азадна.
24-июндиз Сергей Меликован Указдалди Сергей Касьянов, кIвалахдин рекьяй кутIуннавай икьрардин вахт акьалтI хьунихъ галаз алакъалу яз, Дагъустандин яшайишдин кIвалерин государстводин инспекциядин регьбердин къуллугъдикай азадна.
Агьмед Магьмудов
