4-июндиз Ахцегьа райондин суддин цIийи председатель тайинаруниз талукьарнавай мярекат кьиле фена. Ана РД-дин Верховный суддин председатель Фёдор Шукина, РД-да авай УСД-дин (Управление судебного департамента) начальник Руслан Нагъиева, Ахцегь ва Рутул районрин кьилевайбуру, суддин, къайдаяр хуьдай органрин, прокуратурадин ва СМИ-рин векилри иштиракна.
Мярекатдин эвел кьиляй Фёдор Шукина райондин суддин коллектив ва кIватI хьанвайбур цIийи председателдихъ — Шайду Саругълановахъ — галаз танишарна. Рахунар авурдалай кьулухъ ада цIийи судьядив РФ-дин Президент В.В.Путинан къул алай къуллугъдин шагьадатнама вахкана.
Тебрикдин гафар мярекатдал мад Ахцегь райондин кьил Абдул-Керим Палчаева, райондин прокурор Мегьамедрасул Дибирова, судья Мурад Рашидова, Россиядин МВД-дин Ахцегь районда авай МО-дин начальник Эльдар Ибрагьимова, Рутул райондин кьилин куьмекчи Ширин Омарова ва масабуру лагьана.
Вичин нубатда Шайду Саругъланова вичел жавабдар къуллугъ ихтибарунай сагърай лагьана ва кIвалахдин рекье вич анжах гьахълу къарарар кьабулунин терефдар жедайди къейдна.
Дашдемир Шерифалиев
