Чи ватанэгьли, жегьил духтур Ренат Къурбанисмаиловаз РД-дин здравоохраненидин министрдин заместителдин къуллугъ теклифда.

15-августдиз республикадин регьбер Фёдор Щукина мукь­ва­ра Дагъустанда малумарай «Ко­манда Дагестана» программада иштиракун патал арзаяр рекье тунвай сифтегьан иштиракчийрихъ галаз гуьруьш кьиле тухвана.

Абурукай сад чи ватанэгьли Ренат Къурбанисмаиловни тир. Гуьруьшдин нетижада Фёдор Щукина малумарайвал, адаз Дагъустандин здравоохраненидин министрдин заместителдин къуллугъ теклифда.

Ренат Къурбанисмаилован бинеяр Мегьарамдхуьруьн райондин Гилийрин хуьряй я. Алай вахтунда Красноярскда яшамиш­ жезва. Ам аялар тежезвай дишегьлийринни итимрин месэ­лай­рай кьил акъудзавай «Духтур ­Ре­натан клиника» медцентрадин­ кьилин духтур, медицинадин илимрин кандидат, «Россия –  мумкинвилерин уьлкве» чIехи проектдин сергьятра аваз кьиле­ тухвай «Россиядин башчияр» 3-сезондин «Здравоохранение» паюнин гъалибчи я.

Ренат Къурбанисмаилова гьа са вахтунда Дагъустандин медуниверситетдин проректордин везифаярни тамамарзава. Тежрибалу жегьил духтур лапароскопиядин операциядин куьмекдалди дишегьлийрин репродукциядин сагъламвал гуьнгуьна хтунин цIийи къайда арадал гъунални машгъул жезва.

Мубаракрай. Къуй адахъ мадни еке агалкьунар хьурай!

Чи  мухбир