Дербентдиз мугьман хьайи юкъуз Сергей Меликова 12 хизандив цIийи кIвалерин куьлегар вахкана. Идакай «Лезги газетдиз» РД-дин Кьилин пресс-къуллугъди хабар гана.
«ЧкIидай гьалдиз атанвай, яшайишдин рекьяй къулайвилер авачир кIвалер арадай акъудун алай вахтунда кар алай месэлайрикай сад я. Гьайиф хьи, ахьтин кIвалер пара ава, амма чун абурун кьадар тIимилариз алахънава.
Заз квехъ цIийи кIвалера хушбахтлувал хьана кIанзава. Куь кIвалериз садрани пис хабарар татурай. Къуй куь ва куь аялрин пакадин югъ экуьди, къениди хьурай», — лагьана С. Меликова цIийи кIвалерин сагьибрихъ галаз кьиле фейи гуьруьшдал.
Къейдна кIанда, цIийи кIвалера яшайишдин рекьяй вири къулайвилер ава. Мисал яз, Яшинрин хизан виликдай чкIидай гьалда авай кIвалера 70 кв. метрдикай ибарат квартирада яшамиш жезвай. Гила абуруз 100 кв. метрдин майдан авай гегьенш ва экуь квартира кьисмет хьана. Калимат Яшинади чпин хизандин гьакъиндай къайгъударвал авунай республикадин кьилевайбурун тIварцIихъ разивилин гафар лагьана.
Сергей Меликов цIийи кIвалер ганвай Абдуллаеврин хизандиз мугьман хьана ва абуруз савкьатар пишкешна. Суфрадихъ ацукьна, чаяр хъвазвай чIавуз Абдуллаеврин хизандин векилри Дагъустандин Кьилиз чпин кIвализ мугьман хьунай, хизандиз ихьтин дережада фикир гунай сагърай лагьана.
Къейд ийин хьи, 2022-йисалай инихъ Дербент шегьерда игьтияж авай чкадин агьалийриз, санлай къачурла, 318 кIвал чара авунва.
Агьмед Магьмудов
