Уьлкведин саки вири регионра спортдинни ватанпересвилин «Зарница 2.0» къугъунив эгечIнава. И кардиз талукь шадвилин мярекат меркездин 61-нумрадин юкьван школадани кьиле фена. Ам шегьердин администрацияди ва «Сифтебурун гьерекат» организацияди тешкилнавай.
Къейд авун лазим я, акьалтзавай несил тербияламишунин карда и къугъунихъ еке метлеб ава. РФ-дин Президент Владимир Путина лагьайвал, «Зарница» къугъуни чи аялрини жегьилри чеб Ватандиз вафалу веледар, яшайиш, экономика, культура, спорт вилик тухуз, алай аямдин истемишунриз жаваб гуз, государстводин аслу туширвал, халкьарин садвал, азадвал, ихтиярар хуьз гьазур тирди тестикьарзава.
«Зарница» къугъун школьникрин руьгьдик хайи уьлкведал дамах авунин гьисс кутазвай образованидин, ватанпересвилин, спортдин, культурадин серенжемар, мярекатар акатзавай зурба цикл я. Программадик гзаф крар ква: кIеве акIайдаз, хер-кьацI хьайидаз сифте куьмек гун, тIебиатдин четин шартIара яшамиш хьун, киберкъурхуйрикай жув хуьн, кас галачиз цавай ва чилелай фидай аппаратрихъ галаз кIвалахиз чирун, радиациядин, химиядин, биологиядин эсердикай хуьн, Россиядин государстводин ва военный тарихдин рекьяй чирвилер артухарун…
Мярекатдал РД-дин Кьилин куьмекчи, региондин «Сифтебурун гьерекат» отделенидин председатель Людмила Саидова, Махачкъала шегьердин Собранидин председатель Марис Ильясов, шегьердин администрациядин кьилин заместитель, образованидин управленидин начальник Эмилия Ражабова рахана.
— «Зарница» къугъун аялар ватанпересвилин руьгьдаллаз тербияламишзавай, абурун сагъламвал мягькемарзавай, гележегдани герек къведай пешейрай, яшайишдин месэлайрай чирвилер, вердишвилер гузвай хъсан чешме я. Чи аялрини къугъуна рикI алаз ва гьевесдивди иштиракзва,- лагьана Л. Саидовади.- Махачкъаладин школайрай 25 агъзур аял къугъуник экечIнава.
Къугъун са шумуд паюниз пайнава. ИкI, алай йисан февралдиз командаяр хкядай акъажунар кьиле фена. 1-мартдилай 16-апрелдалди муниципалитетра къугъунин акъажунар тешкилна. Зонайрин ва региондин акъажунар 17-апрелдилай 31-майдалди кьиле фида. ВикIегь командайри 16-июндилай 31-июлдалди кьиле фидай округдин акъажунра иштиракда. Гъалибвал къазанмишай командайриз сентябрдиз тешкилзавай Вирироссиядин къугъунриз фидай майдан ачух жеда. Школьникри 17 номинациядай чпин алакьунар къалурда.
* * *
10-апрелдиз Дербентдин Къазиагьмедован тIварунихъ галай педагогвилин колледждани «Зарница» къугъунин муниципалитетдин паюниз талукь мярекат кьиле фена. Шегьердин администрациядин кьилин заместитель Видади Зейналова къугъунин иштиракчияр тебрикна. «Къенин мярекатда иштиракуналди, куьне, гьуьрметлу аялар, уьлкведин оборона, итижар хуьник куь алахъунрин пайни кутазва. ВикIегьбур, Ватан кIанибур хьухь!»,- лагьана ада. Шегьердин вири школайрин командайри (гьар садак 10 кас квай) дуьздаказ къекъуьнай (строевая подготовка), противогаз алукIунай, кIеве гьатайбуруз сифтегьан куьмек гунай, чукурунай, уьлкведин ва военный тарихар чир хьунай ва спортдин маса жуьрейрай чпин алакьунар къалурна.
Абад Азадов
