18-июндиз Санкт-Петербургда международный дережада аваз тешкилнавай экономикадин форумдин кIвалах гатIунна. Ам 21-инюндалди давам жеда. Ана, кьиле Сергей Меликов аваз, Дагъустандин делегациядини иштиракзава. ЦIи кьуд лагьай сеферда республикади кесерлу майдандал Дагъларин уьлкведихъ инвестицийрин рекьяй авай мумкинвилер къалурзава.
Сергей Меликова вичин телеграм-каналда хабар гайивал, Дагъустанди, форумдин сергьятра аваз, асул фикир кар алай кьве месэладиз гуда: кудай ва ягъламишдай затIарин ери хъсанарун ва «Ozon» компаниядихъ галаз икьрар кутIунун.
«Чна форумдин майдандал кудай ва ягъламишдай затIар акъудзавай уьлкведин виридалайни чIехи са компаниядихъ галаз икьрар кутIунда. Адахъ цIи Дагъустанда алай аямдин вири истемишунриз жаваб гузвай са шумуд АЗС эцигдай ниятар ава. «Ozon» маркетплейсдихъ галазни амадагвилин алакъаяр мягькемардайвал я. Гатун эхирдалди республикада и карханадин логистикадин центрадин сад лагьай блок ачухдайвал я», — лагьана Сергей Меликова.
Агьмед Магьмудов
