Куь къалабулух кутазва?
Дагъустандин ЦУР-ди (Центр управления регионом) алатай гьафтеда дагъустанвийрилай къвезвай арзайриз талукь яз кьиле тухвай кIвалахдин нетижаяр кьуна. Санлай къачурла, республикадин агьалийри жуьреба-жуьре рекьерикай, гьа жигьетдай яз, интернетдин майдандикайни менфят къачуна ЦУР-диз пуд агъзурдалай виниз арзаяр рекье туна. Идарадив виридалайни пара арзаяр 12-августдиз агакьна. И юкъуз ЦУР-дин пешекарри 652 арза кьабулна.
Кьиле тухвай ахтармишунри къалурзавайвал, дагъустанвийрик виридалайни гзаф къалабулух кутазвай месэла мукьвал-мукьвал эквер хкатун я. Виридалайни пара арзаярни и месэладиз талукь я. Санлай къачурла, коммунальный къуллугърин ва абурун кIвалахдиз талукь месэла республикада хцибурукай сад яз амукьзава. И месэладиз талукь яз республикадин агьалийрилай наразивилин гзаф чарар-цIарар, зенгер пара къвезва. Мадни абурук рекьер авай гьалдини (бегьем ремонт тавун, цIийикIа туькIуьр хъувунин кIвалахар яргъалди фин) къалабулух кутазва.
Зирзибилдиз талукь месэлани майдандай квахьнавач. Иллаки гатун вахтунда мукьвал-мукьвал винел акъатзава. Агьалийрилай къвезвай арзайрай аквазвайвал, гзаф чкайра зирзибил гадардай контейнерар бес жезвач, зирзибилни талукь идарайри вахтунда гадарзавач. Гаф кватай чкадал къейд ийин хьи, контейнеррин кьадар артухарун патал мукьвара РД-дин Гьукуматда кьилдин совещание кьиле фенай.
РикIел хкин, гьар са дагъустанвидивай чпик къалабулух кутазвай месэлайрикай соцсетра авай ЦУР-дин официальный каналриз кхьена, хабар гуз жеда.
Агьмед Магьмудов