Дидевилин капиталдикай

Малум тирвал, дидевилин капи­тал­дин­ такьатар яшамиш жезвай кIвалин шар­тIар хъсанаруниз харж ийиз жеда. КIвал Россиядин мулкунал алайди ва куьгь­неди, чкIизвай гьалда авайди хьана кIандач.

Капиталдин такьатар яшайишдин­ кIвалер эцигзавай тешкилатдихъ (ЖСК) галаз кIвал маса къачун патал кутIун­на­вай икьрардайни ракъуриз жеда. Икьрар Росреестрда регистрация ийизва. КIвал диде-бубадин ва аялрин виридан пай квайди яз туькIуьрзава. Паярин кьадар терефрин меслятдалди тайинарзава.

Капиталдин такьатар ишлемишиз жедай мад са рехъ ава – кIвал эцигдайла ва я цIийи хъийидайла. Кьилди къачуртIа, дидевилин капиталдин такьатар анжах яшамиш жезвай чкадин майдан артухар хъувуниз (цIийи чка гилиг хъувун, мансарда, кьвед лагьай мертеба эцигун, чардах цIийикIа туьхкIуьрун) ишлемишна кIан­зава.

МФЦ-дин пешекарри гъавурда твазвайвал, капиталдин такьатрикай ремонтдин кIвалахрин гьакъи гуна менфят къачуз жедач.

Ипотекадиз талукь яз ишлемишиз жеда: такьатар сифтегьан взнос яз ва я асул бурж ва процентар ахлудун патал рекье тваз жеда. И кар аял дидедиз хьайидалай кьулухъ гьасятда кьилиз акъуддай ихтияр ава.

Талукь тир арзаяр МФЦ-да вугуз жеда. Эгер суалар амукьнаватIа, пешекарривай жузуз. Суалар патал телефондин нумра: 666-999.

80 йис тамам хьайила

Пенсионердиз 80 йис тамам хьайи­далай кьулухъ са жерге дегишвилер талукь жезва. Кьилди къачуртIа, страховой пенсия кьве сеферда артух жезва – 9 584,69 манатдилай 19 169,38 манатдал кьван. Гьахъ-гьисаб 80 йис хьайи йикъа­лай талукь пешекарри чпи хъийизва, яни пенсионерди арза вугунин лазимвал авач.

Чир хьун важиблу я: артух хьун вири пенсиядиз ваъ, анжах тестикьнавай паю­низ талукь я. 1-группадин инвалидриз пен­сия тикрарна артух хъувун тайинарзавач.

Социальный пенсия ва кьилел кас ала­мачирла гузвай пенсиядиз талукь жезвач.

Гелкъуьнай алава хъийизвай такьатар: вацра 1413,86 манат тайинарзава. Арза вугунин лазимвал авач.

Капитальный ремонт гьавая жезва. Эгер кIвалин хсусиятчиди капремонтдин гьакъи 100 процентдин ганваз хьайитIа, сагьибдин 80 йис хьайидалай кьулухъ адаз эвездин такьатар хгуда. И такьатар вахчун патал МФЦ-да арза вугун герек я.

Кьудкъад йис хьайибуруз мад са кьезилвал жезва: эменнидин налогдикай азад жезва (гьар са жуьредин анжах са объектдикай; месела, са квартирадин, са хсуси кIвалин, са гараждин налогдикай). Са шартI ава: эгер объект бизнес патал ишлемишзавайди туштIа.

Чилин налогдикайни, эгер участок 6 соткадилай тIимил ятIа, азадзава. 

"Лезги газет"