Игит рикIел хкана
27-сентябрдиз Дербент райондин Белиж поселокдин спортшколадин залда, Россиядин Игит Муслимов Муслим Жавадович рикIел хкуниз талукьарна, азаддаказ кьуршахар кьунай ачух турнир кьиле фена. Турнирдин тешкилатчияр Дербент райондин администрацияни Белиж поселокдин 2-нумрадин ДСЮШ тир.
Турнирда Кьиблепатан Дагъустандин районрайни кьве шегьердай атанвай 2011–2013 ва 2014–2015-йисара ханвай 150 жаванди иштиракна.
Спортдин мярекатда Дербент райондин кьил Элман Аллагьвердиева, РД-дин туризмдинни халкьдин сеняткарвилерин министрдин везифаяр вахтуналди тамамарзавай Эмин Мерданова, Россиядин Игитдин буба Жавад Муслимова ва уьмуьрдин юлдаш Анастасия Муслимовади, Белиж поселокдин кьилин везифаяр тамамарзавай Абдулмежид Ражабова, дуьньядин чемпионрини спортдин мастерри, къунши хуьрерин администрацийрин кьилери, юкьван ва спортдин школайрин директорри ва масабуру иштиракна.
Акъажунар гатIундалди кьиле фейи мярекатдал Э. Аллагьвердиевани Э. Мерданова Муслим Муслимован кьегьалвилерикай ихтилатна, ада Ватандиз халисан ватанпересди хьиз къуллугъ авурди къейдна, игитдиз тербия гайи деди-бубадиз сагърай лагьана, жаван спортсменриз турнирда агалкьунар хьун алхишна.
Игитдин уьмуьрдин юлдаш Анастасия Муслимовади махсус серенжемдин иштиракчийрин хизанриз куьмек гузвай райондин кьилиз, турнирдин тешкилатчийриз ва ам кьиле тухуз куьмек гайи меценатриз сагърай лагьана.
Турнирдин нетижаяр кьурла, кIвенкIвечи чкайриз Темирханов Али (32 кг), Рамазанов Рашид (35 кг), Римиханов Усман (41 кг), Тарланов Руслан (52 кг), Рамазанов Юсуф (57 кг), Эседуллаев Мугьаммад (62 кг), Вагьабов Руслан (68 кг) лайихлу хьана.
Гъалибчийриз ва призерриз турнирдин фондунин патай кубокар, медалар, дипломар, дережайриз килигна, пул авай конвертар, къиметлу пишкешар гана. КIвенкIвечи чкайриз лайихлу хьайи спортсменриз, алава яз, меценатдин патай велосипедарни пишкешна.
Спортдин турнирдин иштиракчийрин гуьгьуьлар райондин культурадин кIвалин артистри лагьай манийри ва авур кьуьлери генани цицIи авуна.
Эхирдай рахай рагьметлудан багърийри турнир тешкилайбуруз ва ана иштиракай вири командайриз сагърай лагьана, спортда генани чIехи гъалибвилер къазанмишун алхишна.
Турнир неинки спортдин важиблу вакъиадиз, гьакIни жегьилар патал ватанпересвилин метлеблу тарсуниз элкъвена.
Къагьриман Ибрагьимов