Ватандин ЧIехи дяве башламиш жедалди Негъи Алирзаева вичелай чIехибурухъ галаз санал колхозда зегьмет чIугвазвай. Сифтедай четин тиртIани, гуьгъуьнлай ам вердиш хьанай. Галай юлдашрилай чешне къачуналди, адаз векь ягъиз, къуьл кIватIиз, арабадик гамишар кутIуниз, паласада вири кIвалахар ийиз чир хьана. Нетижада колхозда адан тариф акъатна. Жегьилдин рикIе колхоздин гзаф кIвалахар гуьнгуьна тунин фикирар авай. Амма душманди бейхабардиз Ватандал вегьена…
Сифте Негъи Алирзаев Хасавюртдани Бабаюртда зегьметдин фронтда хьана. Ахпа Тифлисда ва Прохладный шегьерда сифтегьан вердишвилер къачуна, стрелковый 177-полкуник кваз Краснодардинни Батайск шегьеррин патарив къизгъин женгерик экечIна. Хъсан лишанчи яз ада Ростов, Новочеркасск, Шахты шегьерар патал кьиле фейи къати ягъунра вичин алакьунар къалурнай. И женгера Негъидин эрчIи гъилин пуд тIуб, капун са пайни кваз, галатна. И залан хер сагъар хъийиз ам яргъалди госпиталда хьанай. ЯтIани, ада вич мад фронтдиз рахкурун тIалабнай. Кьегьал лишанчиди, стрелковый 890-полкуник кваз, Каменский шегьер, ахпа Керчь, Севастополь азад авунин къати женгера иштиракна.
Ватандин вилик къалурай кьегьалвилерай Негъи Алирзаев Ватандин дяведин II дережадин ордендиз, “Дирибашвиляй” ва маса медалриз лайихлу хьана.
Дяве куьтягь хьана, хуьруьз хтай Негъидал чуьлдин бригадирвилин кIвалах ихтибарна. Яргъал йисара адан бригадади техилдин, векьерин бул бегьерар кIватIиз, колхоздин планар ацIурна.
Райсудин Набиев
