Квез и шикилдай аквазвайди Дербентдин “Электросигнал завод” ОАО-да  кIва­лахзавай  Ибрагьимова  Шамайхалум  Тагьирмирзоевна  я. Вичин ери-бине Сулейман-Стальский райондин КIварч­агъ­рин хуьряй тир ам Дербентда яшамиш жез­ва. Ада са тIимил вахт идалай вилик ярар-дустарихъ, багърийрихъни мукьва-кьилийрихъ галаз шад гьалара вичин 60 йисан юбилей къейднай. Гатфарин и йи­къара ада винидихъ тIвар кьунвай акционеррин обществода кIвалахиз  40 йис ­тамам хьанва…

Ш.Ибрагьимовади зегьметдин рехъ Дербентда гамар храдай фабрикадилай башламишна. “18 йис тахьанвайвиляй зун санани кIвалахал кьабулзавачир. ГъвечIи чIавалай гамар хразвайди чир хьайила, гьикI ятIани, фабрикадиз гамар храдай устIарвиле кьабулна. Ахпа заз фабрикадин регьберри са шумудра грамотаяр, пулдин пишкешар ганай, абур зи кIва­лах­дилай рази яз амукьнай”, — ри­кIел хкизва ада.

— КIвалахдик, кар-кеспидик квачиз заз садрани кьарай атайди туш. Алатай асирдин юкьварилай алатайла (1959-йис) арадал атай “Электросигнал” завод республикада вилик-кьилик квай карханайрикай сад тир. Ам оборонадин министерство патал махсус тадаракар — ра­диостан­­цияр, радиорелейный станцияр, командно-штабной машинар патал ала­къадин къурулушар (са вахтара ина гьакI­ни танкар, бронемашинарни акъуднай), парашютрай гадарай шейэр жа­гъур­дайбур хьтин маса затIарни акъудунал машгъул тир, — суьгьбет давамарзава Шамайхалум халади. — Ихьтин зурба заводда кIвалахун кьисмет хьунал, хиве авай везифаяр лайихлудаказ кьилиз акъудиз алакьунал зун пара шад я. Идахъ галаз сад хьиз, ина кIва­лах­завай коллективни туькIвей, гьуьрметлуди я.

Малум тирвал, алай вахтунда завод военный рекьяй техника ремонт авунал машгъул я. Идалайни гъейри, ина радио ва телеаппаратура, агьалийрин патай игьтияж авай маса метягьар (товарар) акъуд­зава. Ш.Ибрагьимовади махсус станокдин (прессдин) куь­мек­далди машинриз лазим тир дета­лар­ гьазурзава. Вичин хиве авай везифайрив намуслувилелди эгечI­за­вай­виляй адал хсуси тагъма (клей­мо) ихтибарнава. Ам гьуьрметдин хейлин грамотайри, рикIел аламукьдай пишкешри, премийри мадни руьгьламишна.

Са кар мадни къейд ийиз кIанзава, Шамайхалум Тагьирмирзоевна кIвен­кIве­­чийрин жергеда, тIварни шикил гьамиша Гьуьрметдин доскада ава. Хъсан къи­лихдин, рикI михьи, гъил ачух Ш.Иб­ра­­гьимовадиз чна мукьва жезвай Гъалибвилин югъни рикIин сидкьидай тебрикзава. Адахъ уьмуьрдин яргъал йисар, чандин сагъвални хизанда хушбахтвал хьун алхишзава.

Рагнеда  Рамалданова