Алатай гьафтеда Железноводск шегьерда РФ-дин Гьукуматдин Председателдин заместитель Дмитрий Патрушеван регьбервилик кваз Кеферпатан Кавказдин федеральный округдик акатзавай регионрин АПК-дин (агропромышленный комплекс) хел вилик тухунин месэлайриз талукьарнавай совещание кьиле фена. Адан кIвалахда РД-дин Кьил Сергей Меликовани иштиракна.
Д.Патрушева хабар гайивал, 2025-йисуз Россиядин АПК-дин хел вилик тухуниз уьлкведин Гьукуматди 500 млрд манат пулдин такьатар чара авуна. Ада гьакIни къейд авурвал, алай вахтунда Кеферпатан Кавказдин федеральный округда хуьруьн майишатдин хиле 30-дав агакьна инвестицийрин чIехи проектар кьилиз акъудзава. Абур малдарвал, багъманчивал, майвачивал, ципицIчивал ва хуьруьн майишатдин са жерге маса хилериз талукь я.
Совещанидал С. Меликова вичин рахунра Дагъустанди хуьруьн майишатдин хиле къазанмишнавай агалкьунрикай ихтилатна. Адан гафаралди, Дагъустан аграрный республика я ва хуьруьн майишатдин суьрсетдин са шумуд жуьре гьасилунай Дагъларин уьлкведи Россиядин регионрин арада кIвенкIвечи чка кьазва.
С.Меликова къейд авурвал, хуьруьн майишатда разивализ жедай агалкьунар федеральный бюджетдай агакьзавай куьмек себеб яз къазанмишиз хьанва. Мисал яз, алай йисуз республикадин АПК-дин хел вилик тухуниз федеральный бюджетдай 3,7 млрд манатдив агакьна пулдин такьатар чара авун пландик кутунва. Алатай йисав гекъигайтIа, и рекъем саки 846 миллион манатдин гзаф я.
Дагъустандин Кьили гьакIни республикадин хуьруьн майишатда кьетIен фикир гузвай хилерни къейдна. Абурун арада прунзчивал, ципицIчивал, багъманчивал, майвачивал, хипехъанвал ва чилерин мелиорация ава.
Гегьеншдиз РД-дин Кьилин сайтдай кIелиз жеда.
Агьмед Магьмудов
