СтIал Сулейманан районда 2017-йисуз яшайишдинни коммунальный «Касумкент — сервис» майишат тешкилна. Гьа чIавуз райондин кьил Нариман Абдулмуталибова карханадин кьиле райондихъ рикI кузвай кас тир Фатагьов Гъалиб Играмудинович тайинарнай. Хуьрерин агьалийри «Касумкент — сервис» ООО-дин кIвалахдилай разивалзава.
Карханадин асул везифайрик хуьрерай яшайишдин кIеви амукьаяр (ТКО) кIватI хъувун ва тайинарнавай махсус полигондал тухун акатзава. И рекьяй районда кардик квай тешкилат алатай йисуз республикада вилик жергеда авайбурукай сад хьана.
— Санлай къачурла, карханади СтIал Сулейманан, Кьурагь, Хив ва Агъул районрин агьалийриз къуллугъзава, — лугьузва Гъалиб Фатагьова. — Кьилди СтIал Сулейманан райондикай рахайтIа, чна муниципалитетдин 39 хуьряй яшайишдин кIеви амукьаяр кIватI хъийизва. И хуьрерин агьалийрин кьадар 55 агъзурдалай виниз я. ТКО-ни чи пешекарри хуьрерин администрацийрихъ галаз меслят хьана туькIуьрнавай графикдин бинедаллаз кIватI хъийизва. И жигьетдай хуьрера, яшайишдин кIеви амукьаяр кIватI хъийиз, транспортдин такьатар фидай куьчейрин планарни тайинарнава.
Гьелбетда, карханадин кIвалах хъсан хьун анин работникар чпин хиве авай везифайрив жавабдарвал гьисс авуна эгечIунилай гзаф аслу я. И жигьетдайни ина кIвалах дуьз тешкилнава.
Хъсандиз кIвалахзавайбурукай яз, Гъалиб Фатагьова чаз шоферар тир Н. Гьажибегован, И. Омарован, З. Самедован, В. Эседован, З. Абдурагьманован, М. Алимирзоеван, Ф. Мегьамедагъаеван, рабочияр тир Л. Алибегован, З. Алибегован, Т. Магьмудован ва масабурун тIварар кьуна.
«Касумкент — сервис» ООО-дин регьбер Гъалиб Играмудиновичахъ галаз чун карханадин техника авай гьаятдизни фена. Инанмиш хьайивал, адахъ вичин хсуси ва арендада кьунвай бес кьадар техникани ава: зирзибил кIватIдай машинар, тракторар ва махсус маса улакьар.
Техникадикай рахадайла, Гъ. Фатагьова ихьтин са карни къейд авуна: карханадиз, 2019-йисалай эгечIна, меценатар тир Имам Яралиева, Салман Мегьамедрасулович Бабаева гьам техникадин, гьамни пулунин такьатрин патахъай еке куьмекар гузва. Идай абуруз коллективди, хуьрерин агьалийри ва райондин кьиле авайбуру чухсагъул лугьузва.
— Гьелбетда, муниципалитетдин кьил Саид Темирханован, администрациядин патай куьмек галачиз чавай кIвалах дуьз тешкилиз ва кьиле тухуз хьун мумкин кар туш, — давамарзава ихтилат Гъалиб Фатагьова.
«Касумкент — сервис» ООО-дин къурулушда абонентвилин отдел кардик ква. Адаз вичихъ кIвалахдин ва уьмуьрдин девлетлу тежриба авай пешекар тир Рамиз Бабаева регьбервал гузва. Отделдин кIвалахдилай чун гзаф рази я.
Агьалийривай яшайишдин кIеви амукьаяр кIватI хъувунай пул къачузвай къуллугъдин кьил Ислам Нежведиловни вичин хиве авай везифайрив жавабдарвал гьисс авуналди эгечIзава.
Хазран Кьасумов
