Чи ватанэгьлияр — гьар сана

Расим Шамсудинован агалкьун­рикай­, духтуррин, ада регьбервал гузвай азарханадин къуллугъчийрин, Сама­радин­ агьалийрин арада адахъ авай гьуьр­мет­дикай заз таможнядин инспекциядин къул­лугъчи Марат Гьажиева ихтилатна. Чешнелу ватанэгьлийрихъ галаз газет кIел­­завайбурни танишарун давамарзава чна…   

Расим Шамсудиновича алай вахтунда­ Самарадин 6-нумрадин­ азарханадин кьилин духтур яз кIва­­лахзава. Ада регьбервал гузвай гьукуматдин ида­радин тежри­бадин кIвалахда алай девирдин медицинадин цIийи къайдаяр, технологияр агалкьунралди ишлемишзава.

Р. Шамсудиноваз 2020-йисуз РФ-дин здравоохраненидин министрди чухсагъулдин чар гана.­ КIва­лахда къазанмишнавай агалкьунриз, гзаф йисарин бегьерлу­ зегьметдиз килигна, Самарадин об­­ластдин здравоохраненидин ми­­­­нистерстводин патай адаз са шумудра гьуьр­метдин грамотаяр гана. РикIинни дамаррин хирургиядиз талукь пешедай кьилин категория авай ам телемедицинадин рекьяй областдин минздравдин штатдик квачир кьилин пешекарни я.

Расим Шамсудинов 1976-йисан 5-майдиз Азербайжандин Апшерон райондин Хырдалан поселокда (адан бубайрин ватан СтIал Сулейманан райондин Вини СтIа­лар я) къуллугъчийрин хизанда дидедиз хьана.

«Муаллимвиле кIвалахзавай дидеди зун гъвечIи чIавалай чирвилер къачунал кIевелай желбна. И чирвилери зи гележегдин рехъ тайинарна, заз жуван рикI алай пеше хкядай мумкинвал гана», — рикIел хкизва Расим духтурди.

1993-йисуз ада юкьван мектеб,  1999-йисуз Дагъустандин госмедакадемиядин сагъарунин факультет куьтягьна­. Инал ада чирвилер къачунин рехъ акьал­тIарнач: 1999-2001-йисара Махачкъалада тади куьмекдин азарханада «Хирургия» пешедай интернатура кьилиз акъуд­на. Духтурди ихтилатзавайвал, азарлуяр кьабулдай отделенидин духтур-хирург яз кIвалахуналди, ина хьайи вахтунда пешедин рекьяй девлетлу тежриба кIватIна. Пешекарвилин дережа мадни хкажун патал гуьгъуьнин 2 йисуз ада Самарадин госмедуниверситетдин дип­ломдилай гуьгъуьнин образованидин институтда хирургиядин рекьяй ординатурада чирвилер артухарна. Гьа са вахтун­да Самарадин областдин М. Калининан­ тIварцIихъ галай клиникадин азархана­да духтур-хирург яз тежриба кIватIун да­вамарна, 2005-йисалай и азарханадин­ дамаррин хирургиядин отделенида кIва­лахна.

2011-2019-йисара Расим Шамсудино­­ва Самарадин областдин В. Середа­ви­нан­­ тIварцIихъ галай клиникадин азарха­на­дин­ кьилин корпусдин операцийрин блокдиз­ регьбервал гана. Ина ада суткадин кьи­ляй-кьилиз агьалийрин сагъламвилиз къул­лугъ ийидайвал кIвалах тешкилна, хъсан пешекарар хкяна, абурун пешекарвал, чирвилер артухарун гуьзчивилик кутуна.

2018-йисуз дуьньядин дережада футболдай чемпионат кьиле фидайла, вичи кIвалахзавай азарханада куьмек гун патал медицинадин команда тешкилна. Чемпионат кьиле фейи вахтунда, энгел тавуна, медицинадин рекьяй куьмек агакьардай махсус отделенидин кьиле акъвазна.

Ашкъидивди ва гьа са вахтунда тежриба хкажуналди кIвалахзавай пешекар, регьбервал гудай алакьунар авай духтур хьуниз килигна, адал жавабдар къуллу­гъарни ихтибарзава. 2019-йисуз винидихъ тIвар кьунвай азарханада хирургиядин рекьяй кьилин духтурдин замес­титель яз, ам хирургиядин къуллугъдин­ кьиле ­акъвазна. Коронавирусдин тIугъ­вал чкIай вахтунда Самарадин областда 2020-йисан апрелдилай ада духтуррин жергедай сифтебурукай яз писдаказ начагъбур кьабулунин, абур сагъарунин кIвалах тешкилна.

Самара шегьердин 6-нумрадин азарханадин кьилин духтурдин къуллугъдив чи ватанэгьли 2020-йисан 18-декабр­диз эгечIна. Им тIугъвалди агъавалзавай­ четин муддат тир. ЦIийи регьбер­ди­лай са гъвечIи вахтунда вирусди акIа­жар­за­вай­бур сагъарунин рекье еке кIва­лахар тамамариз, алава серенжемар кьа­булиз, идара цIийи тадаракралди таъминариз алакьна.

Малум хьайивал, Р. Шамсудинова­ регьбервал гайи вахтунда здравоохране­нидин идарадин къурулуш гегьенш ва подразделенийрин мумкинвилер артух хьана, материалринни техникадин база­ хъсан хьана. Алай аямдин медицинадин­ тадаракрин чIехи пай федеральный­ «Здра­воохраненидин сифтегьан хел цIийи хъувун» проектдин сергьятра аваз къвезва. Идани регьбердин тешкиллувилин, къайгъударвилин ерияр успатзава. Адалай кIвалахда информациядин технологияр кардик кутунин жигьетдай Самарадин областда азархана чешнелубуруз элкъуьриз алакьна.

Кьилин духтур жемиятдин краривайни къерех хьанвач: 2022-2023-йисара ам агьалийриз медицинадин рекьяй куьмекар гун патал пуд сеферда Донецкдин халкьдин Республикадин Снежное шегьердиз фена. Хирургиядин ва рикIинни дамаррин хирургиядин рекьяй начагъбуруз куьмек гунай адав азарлуйрин, абурун багърийрин патай разивилин келимаяр, алхишар гзаф агакьна. Донбасс­да медкъуллугъчийрин кьиле акъвазунай, СВО кьиле физвай зонада операцияр кьилиз акъудунай РФ-дин здравоохраненидин къуллугъчийрин Самарадин областдин профсоюздин тешкилатди Расим Шамсудиновичаз «Чандилайни гъил къачуна, зегьмет чIугунай ва пешекарвиляй» медаль гана.  Ам «Лайихлувилерай» лишандин, «Мергьяматлувиляй ва куьмекар гунай», «Инсанриз къуллугъ авунай» медалрин сагьиб я. Интернетдин духтурриз талукь махсус сайтрани адаз агьалийри кхьенвай алхишдин келимаяр цIудралди дуьшуьш жезва.

Чаз лайихлу ватанэгьлидихъ мадни еке агалкьунар хьана кIанзава.

Куругъли Ферзалиев