2025-йисан 25-27-майдин йикъара международный выставкайрин «МинводыЭКСПО» центрада инвестицийриз талукь чIехи КИФ-2025 форум кьиле фида — ада государстводин ва корпорацийрин хилен регьберар, пешекарар ва СМИ-рин векилар са майдандал кIватIда.
Форумдин тешкилатчи, РФ-дин Гьукуматдин ва Россиядин экономикадин рекьяй виликди финин министерстводин куьмекни галаз, Росконгресс Фонд я. КИФ-дин тешкиллувилин комитетдин кьиле РФ-дин Гьукуматдин Председателдин заместитель Александр Новак акъвазнава. Хабар гузвайвал, форумдин виридалайни чIехи амадаг «КАВКАЗ.РФ» АО я, стратегиядин рекьяй амадагар — ГК «Дамате», ПАО Сбербанк, ПАО «Промсвязьбанк» ва ПАО «Россети» компанияр. Амадагрин сиягьда «Ростех» ГК, Минводы шегьердин М.Ю.Лермонтован тIварунихъ галай международный аэропорт ва ДОМ.РФ» АО ава. Мярекат тухунин карда гьакIни «ЛУКОЙЛ» ПАО-ди ва «Холдинг Аква» компанийрин дестедини куьмекар гузва.
Кьиле тухуз башламишайдалай кьулухъ алатнавай йисарин вахтунда КИФ-ди вич Россиядин карчивилин, виниз тир пешекарвилин ва выставкайрин кар алай майдан хьиз раижнава, ада гьукумдин, бизнесдин ва пешекаррин жемиятдин арада вири терефриз хийирлу алакъаяр тайинариз куьмек гузва. Месела, КИФ-2024 форумдин сергьятра аваз, карчивилин 65 мярекат кьиле фена, абура, федеральный ва регионрин гьукумдин органрин векилар, бизнесменар, вини дережадин пешекарар ва международный кар алай СМИ-рин журналистарни кваз, дуьньядин 33 уьлкведай тир 430 спикерди ва 4 агъзур делегатди иштиракна.
Ида форумдиз еке итиж ийизвайди ва СКФО-дихъ инвестицийрин жигьетдай еке мумкинвилер авайди тестикьарзава. КИФ-2024 форумдин нетижада, санлай къачурла, 106,1 миллиард манатдин къимет авай 100 икьрардал къулар чIугуна. КьетIен фикир яргъал йисара къуватда жедай амадагвилин ва бизнес-алакъаяр тайинарунин месэлайриз гузва. КИФ-ди инвесторар патал цIийи мумкинвилер ачухзава, абуруз регионрин истемишунриз жаваб гузвай инновациядин проектар вилик тухуз ва цIийи амадагар жагъуриз куьмекзава. Форумда иштиракуни гележегдик пай кутадай, зурба проектар уьмуьрдиз кечирмишдай ва инвестицийрин жигьетдай гележег авай мумкинвилер ахтармишдай рекьер ачухзава.
КИФ-2025 форумдин иштиракчияр патал вуч гьазурнава?
- И йисуз форумда 5 агъзурдалай гзаф ксари — государстводин гьукумдин регьберри, Россиядин ва международный чIехи компанийрин топ-менеджерри, илимдинни экспертрин жемиятдин векилри иштиракда.
- 2025-йисуз форумда вилик эцигнавай асул месэла «Инвестицийрин рехъ: Алатай вахт. Алай вахт. Гележег» жеда.
- Мярекатдал веревирд ийидай месэлайрик жеда: карчивал, агропромышленностдин, энергетикадин, транспортдин, туризмдин, здравоохраненидин хилер виликди тухун, гьакIни и рекьерай маса уьлквейрихъ галаз санал кIвалахун ва яшайишдин рекьин месэлаяр.
- Карчивилин программа: кIвенкIвечи экспертрин ва сиясатдин рекье кар алай пешекаррин иштираквал авай пленарный заседание, гьар жуьре месэлайрай сессияр, веревирдер ва карчивилин рахунар.
- Образованидин, культурадин ва спортдин рекьяй къалин программаяр — мастер-классар, лекцияр, гьар жуьре миллетрин тIуьнрин фестиваль ва икI мад.
Амина Муслимова
