Ахцегь вацIун дереда республикадин метлебдин рехъ цIийикIа туькIуьр хъувунихъ галаз алакъалу яз, Ахцегьрин Пельтуьй­рин магьледа Чаварбандин кIа­мал ра­кьунни бетондин чарх алай мягькем муьгъ эцигзавайдакай чна хабар ганай. Мартдиз Ухулрин хуьруьн устIарри эцигиз эгечIай ам саки бегьем хьанва.

Агъсакъалри рикIел хкизвайвал, гьеле 90 йис идалай вилик муькъверин машгьур устIарар тир Уста Идрисани Зейнедина а кIа­мал, арабаярни файтунар фикир­да аваз къванцин чарх алай мягькем муьгъ эцигнай. Чи девирдин­ залан машинарни тракторар физ, ада та къенин йикъал­ди, яни чукIурна ва цIийиди эцигиз эгечI­далди, халкьдиз къуллугъна. Къванцин тагъдин къене гьамамар галай патан чапла цла тарихдин къванни авай. Куьгьне муьгъ залан экскаватордалди чукIурдайла, садани фикир тагана, гьайиф хьи, тарихдин къван квахьна.

«Ахцегь – Къурукал – Хинер» машиндин рехъ (0-3,2 км) бинедилай  ремонтунин кIвалахар, респуб­лика­дин «Зи Дагъустан – зи рекьер» программадин­ сергьят­ра аваз, «Даг­автодорди» (директор – Микаил­ Мегьамедов) кьиле тухузва. Заказчик РД-дин транс­порт­дин­ ва рекьерин майишатдин минис­терство я. 2027-йисан эхирра иш­лемишиз вахкана кIанзавай 3,2 километр рекьин проектдин умуми­ къиметди РД-дин бюджетдай серфзавай 162 млн манат тешкилзава. Адакай тахминан 8 млн манат вичикай ихтилат физвай Чаварбандин кIамун муькъуьз акъатзава.

Дашдемир Шерифалиев