РикIера хуьзва
Алай йисуз лезгийрин бажарагълу шаир Кесиб Абдуллагь дидедиз хьайидалай инихъ 150 йис тамам хьанва. Ноябрдин эхирра КцIар райондин Манкъулид хуьре и вакъиадиз талукьарнавай мярекат кьиле фена.
Лезги шииратдин межлисдин иштиракчийри, эвела Манкъулид хуьруьн сурариз фена, Кесиб Абдуллагьан, Забит Ризванован, Медет Эрзиманован экуь къаматар рикIел хкана, дуьаяр авуна. Гуьгъуьнлай вири хуьруьн медениятдин кIвалин чIехи залда кIватI хьана.
Мярекатдал рахай лезги шаирри — Эйваз Гуьлалиева, Гуьлбес Асланхановади, Муьшкуьрви Вакъифа, Багьрам Залова ва масабуру Кесиб Абдуллагьан уьмуьрдикай, адан эсеррикай ихтилатар авуна, чпин фикирар лагьана, шиирар кIелна, чIехи шаирдин тIвар, экуь къамат рикIера хуьзвайди къейдна. Лезги манидарри лагьай милли манийри иштиракчийрин гуьгьуьлар шадарна, чкадин мектебда чирвилер къачузвай аялри кIелай Кесиб Абдуллагьан шиирри абурук руьгь кутуна.
Межлисда Кесиб Абдуллагьан хизанар ва патарилай хтанвай мукьва-кьилияр авай. Абуру, чпин чIехи бубадин ирсиниз талукьарна, мярекат тешкилайбурун тIварцIихъ разивилин келимаяр лагьана. Къейд ийин хьи, шаирдин межлис хъсан дережада аваз кьиле тухун патал герек такьатар Манкъулид хуьряй тир Уруж Уружева чара авунвай.
Чи мухбир
