Леваши райондин 17 йисан яшда авай агьалидал ВАЗ-2112 маркадин машин чуьнуьхунай шак физва. И йикъара Агъа Агъачаул хуьруьн 28 йисан яшда авай агьалиди Къарабудахкент райондин полициядин дежурный частуниз вичин машин чуьнуьхнавайдакай хабар гана. Адан гафаралди, йифиз вичин кIвалин патав акъвазарай ВАЗ-2112 машин (300 агъзур манатдин къиметдик квай) экуьнахъ анал аламукьнач.
Полициядин тади серенжемар кьабулдай къуллугъчийри машин чуьнуьхнавайди яз шак физвай кас тайинарна. Ам Леваши райондай и хуьруьз мугьманвилиз атай жегьил тир.
Шак физвайда вичи авур нагьакьан кар хиве кьуна. Машиндин патавай фидайла, адаз улакьдин рак ахъазвайди ва куьлегарни чкадал алайди акуна. Идалай кьулухъ ам элкъвена кIвализ хъфена, вич чир таххьун патал кьилел кепка алукIна, элкъвена хтана ва машин чуьнуьхна. Амма кепкадикай куьмек хьанач.
Чарадан машин ихтиярда гьатай жегьилди, къастуналди рекьин гьерекатрин къайдаярни чIуриз, улакь вичин рикIел атай патахъ гьална. Гуьгъуьнлай ада машин хуьруьн къерехда туна. Ам сагьибдив вахканва. Агьвалатдин патахъай дуван авун давам жезва.
27 ДТП
Дагъустандин МВД-дин госавтоинспекцияди хабар гузвайвал, 2-июндилай 8-июндалди Дагъустандин мулкара улакьрин 27 авария арадал атана. Нетижада 7 кас кьена ва 34-дал жуьреба-жуьре хирер хьана (абурун жергеда 4 аялни ава).
«ЛГ»
