25-октябрдиз Абу-Даби шегьерда (Сад хьанвай Арабрин Эмиратар) UFC 321 лишандик кваз кесерлу акъажунар кьиле фена. Ана бине Кьасумхуьрелай тир чи викIегь ватанэгьли Икрам Алискерова гъалибвал къачуна.
Кьиблепатан Кореядин векил Юн Ён Пакдихъ галаз кьиле фейи бягьс пуд раундда давам хьана. Гьасиррал экъечIай сифте декьикьадилай Икрам Алискерова къаст ва викIегьвал къалурна: ада инанмишвилелди гьужумзавай, бягьс пешекарвилелди, гъавурда аваз тухузвай. Пуд лагьай раундда лагьайтIа, чи ватанэгьлиди вичиз акси экъечIнавайдаз жавабдин гьужумар хъийидай мумкинвал тунач.
Нетижада судьяйрин къарардалди, 30-27 гьисабдалди Икрам Алискеров гъалиб хьана.
Къейд ийин хьи, нубатдин агалкьун викIегь лезги хци UFC-дин сергьятра аваз тешкилзавай акъажунра къазанмишнавай кьуд лагьай гъалибвал я. Спортдин рекье адахъ, санлай къачурла, 17 гъалибвал ава.
Чна Икрам Алискероваз нубатдин кукIуш мубаракзава ва адахъ инлай кьулухъ мадни чIехи гъалибвилер къачудай мумкинвилерни къуватар хьун алхишзава.
Чи мухбир
