СтIал Сулейманан райондин Вини СтIалрин хуьряй тир Абдурагьим Агъаханова вичин уьмуьр Россиядин Яракьлу Къуватрихъ галаз алакъалу ийидай къарар гьеле жегьилзамаз кьабулна. РикIе ихьтин къаст авай, мектеб акьалтIарнавай гада, армиядиз фидай яшдив агакьнамазди, Ватандин вилик вичин хивевай пак буржи кьилиз акъудиз фена. Кьисметди ам яргъал тир Иркутскдин областдиз акъудна. Ина 2 йисуз стратегиядин метлеб авай ракетайрин кьушунра къуллугъна, ам хайи республикадиз хтана.

Аскервилин йисара военный рекьяй тайин чирвилер къачунвай А. Агъаханов армиядилай кьулухъ Дагъустандин МВД-дин къурулушда кардик квай са батальонда кIвалахал акъвазна. Са акьван вахт арадай фенач, къунши Чечен Республикада гьалар пайгардикай хкатна, дяведин гьерекатар гатIунна. Им 1999-йисан августдин варз тир. Чи ватанэгьли, РД-дин МВД-дин къуллугъчийриз махсус чирвилер гузвай центр акьалтIарна, Чечнядиз рекье гьатна. Ина вичел ихтибарнавай везифаяр жавабдарвилелди кьилиз акъу­дунай дагъустанви милиционер РФ-дин Президентдин Указдалди «За отличие в охране общественного порядка» медалдиз лайихлу хьана.

Гуьгъуьнлай А. Агъаханова саки 19 йи­суз Махачкъалада къенепатан крарин­ министерстводин органра кIвалахна. Ина ам ротадин командирдин къуллугъдал­ кьван вилик фена. Направленидин бинедаллаз­, имтигьанар галачиз, РФ-дин МВД-дин Вол­гоград шегьерда авай силисдин юри­дичес­кий академиядиз гьахьна. Ина кIел­завай йисара ада ДГТУ-дин автодорожный институтдани чирвилер къачуна. 2009-йисуз­ А. Агъаханова Волгограддин академия акьалтIарна, военный рекьяй кьилин обра­зование авайди тестикьарзавай диплом къачуна. Хизандихъ галаз алакъалу бязи­ месэлаяр себеб яз, ам меркездай хайи райондиз хъфиниз мажбур хьана. СтIал Сулейманан райондин ОВД-да участковый яз кIвалахал акъвазна.

2016-йисуз уьлкведин къанун-къайда хуьдай органрин къурулушда дегишвилер кьиле фена, Росгвардия арадал гъана. А. Агъаханов цIийиз арадал гъанвай Управленида кIвалахал акъваздай фикирдал атана ва ам Москва шегьердиз рекье гьатна. Ина ам Росгвардиядин жергейра къуллугъ ийиз эгечIна.

Украинада дяведин махсус серенжемдив эгечIай юкъуз Абдурагьим Агъаханов авай кьушунрин къуллугъчияр санал кIватIна ва абурукай низ гуьгьуьллудаказ СВО-диз физ кIанзаватIа жузуна. Саки 400 касдикай анжах пуда чеб хушуналди серенжемда иштиракиз гьазур тирди лагьана. Абурукай сад чи ватанэгьли тир. Алай вахтундани ада гьана къуллугъзава.

Мукьвара Абдурагьим Агъаханов Да­гъустандиз куьруь отпускдиз хтанвай. Махачкъалада кьиле фейи чи гуьруьшдал за адавай СВО кьиле физвай гьалдикай, чи аскеррин ватанпересвилин руьгьдикай, абур гьалтзавай четинвилерикай хабарар­ кьуна.

— Отделенидин командир яз, заз СВО-да иштиракзавай чи аскерар авай гьалдикай, абурун ацукьун-къарагъуникай хъсандиз хабар ава, — лугьузва А. Агъаха­нова. — Сифте нубатда лагьана кIанда, абур вири­ кьегьалар я. Ватандин къуллугъда акъваз­навай кьегьалар. Гьар са кас чпел ихтибарзавай везифайрив жавабдарвилелди­ эгечIзава. Недай-хъвадай суьрсетдин­, яракьралди таъминарунин патахъай ра­хай­­тIа, вири къайдадик ква, бес кьадар чара ийизва. Идалай гъейри, СВО-дин ишти­ракчийриз уьлкведин жуьреба-жуьре регионрай, гьа гьисабдай яз Дагъустандайни, недай-хъвадай суьрсет, яшайишда герек къведай затIар рекье твазва. Са гафуналди, и патахъай­ аскерар дарвиле авач. Четинвилерни авачиз туш. Гьи­кьван­ ла­гьайтIани, дяве­дин гьерекатар кьиле физвай майдан я. Ахьтин чкада да­тIана му­къа­ят хьана кIанзава. Чун вири четинви­лериз дурум гуз алахъзава, алакьни ийизва.

СВО-дин гьерекатдикай рахайтIа, чи кьушунрихъ еке агалкьунар ава. Серен­жем гатIунайдалай инихъ Россиядик цIийи кьуд область акат хъувунва. Ибур чIе­хи мулкар я. Шак алач, гъалибвал чи па­та жеда. ГьикI лагьайтIа, гьахъ чи пата ава.

Махачкъалада авай чIавуз Украинада кьиле физвай махсус серенжемдин иштиракчи Абдурагьим Агъахановахъ галаз РД-дин информациядин ва печатдин Агентстводин регьбер Арсен Юсуповани адан меслятчи Мурад Мегьамедкеримова гуьруьш кьиле тухвана. Гуьруьшдал А. Юсуповани М. Мегьамедкеримова Агентстводи СВО-да иштиракзавай ас­керриз куьмек гун патал кьиле тухузвай серенжемрикай ихтилатна. Недай-хъва­дай суьрсетдилай гъейри, гьукумдин органди СВО-диз ватанпересвилин тербиядин литература, газетар, журналар рекье твазва. Гаф кватай чкадал лагьана­ кIанда, РД-дин информациядин ва печатдин Агентстводи, Россиядин журналист­рин Союздин Дагъустандин отделениди­ СВО-дин иштиракчияр патал тешкилзавай мергьяматлу серенжемрик Мурад Мегьамедкеримова чIехи пай кутазва.

Гуьруьшдал Абдурагьим Агъаханова­ Агентстводин кьилевайбуруз аскерриз куьмекар гунай сагърай лагьана ва ватанпересвилин литература, газетар, жур­налар СВО-дин иштиракчийри азад легьзейра рикI алаз кIелзавайди къейдна.

Отпуск куьтягь хьайидалай кьулухъ Абдурагьим Агъаханов дяведин махсус серенжемдиз хъфида. Къуй къастунал кIеви командирдихъ сагъвални агалкьунар хьурай!

Мегьамед  Ибрагьимов