Каспийскда, физкультурникрин йикъаз талукьарна, «Школа ЖКХ» проектдин региондин координатор Хиби Алиева ва «Сад тир Россия» партиядин Каспийскдин отделенидин секретарь, депутатрин собрани­дин председатель Абдулва­гьид Жаватова тешкилуналди­, грэпп­линг­дай дуьньядин чемпион ва РД-дин боксдин федерациядин председателдин меслятчи Явер Межидо­ва кьиле тухвай пакаман зарядкада гзаф кьадар шегьерэгьлийри иш­ти­ракна. Абурун арада жуьреба-жуь­ре яшарин инсанар авай.

- Сагъламвал чаз виридалайни багьа я. Спорт - ам хуьдай хъсан къайда. Юкъуз гьатта 10 декьикьа вахт зарядкадиз серф авунихъни хъсан нетижа жезва. Къе пакамахъ фад къарагъна, югъ менфятлу кардилай башламишайбур сагърай вири! - алхишна А. Жаватова.

Зарядкадилай кьулухъ самоварда гьа­зурнавай чайди ва маса няметри кIватI хьанвайбурун гуьгьуьлар мадни ачу­харна.

Рагнеда Рамалданова