23-сентябрдиз Дагъустанда 12-сеферда кьиле тухузвай жегьилрин образованидин «Каспий-2025» форум ачухуниз талукьарнавай мярекат кьиле фена. Ана РД-дин Гьукуматдин Председатель Абдулмуслим Абдулмуслимова иштиракна.
Вичин рахунра премьер-министрди форумдин иштиракчияр, маса регионрай атанвай мугьманар РД-дин Кьил Сергей Меликован ва жуьреба-жуьре миллетрикай ибарат Дагъустандин халкьдин тIварцIихъай тебрикна.
Къейд ийин хьи, форум кьиле физвай 12 йисан къене Дагъларин уьлкведиз Россиядин 89 региондайни къецепатан 15 уьлкведай 7500-дав агакьна жегьилар мугьман хьана. ЦIи лагьайтIа, форумда уьлкведин жуьреба-жуьре регионрайни къецепатан 8 уьлкведай атанвай пешекарри иштиракзава.
«Гьуьрметлу дустар, чун акьалтIай чIехи дегишвилер кьиле физвай девирда яшамиш жезва. Ихьтин шартIара инсанвилин капиталдин, руьгьдин ивиррин къиметлувал гьич садрани тахьай дережада хкаж жезва. Кеферпатан Кавказдихъ надир кьетIенвилер авайвиляй ам Россия экономикадинни медениятдин рекьяй вилик тухудай цIийи центрадиз элкъведай мумкинвал ава.
Къе девирдин цIийивилер кьабулун, абурукай менфят къачун жегьилрин гъиле ава. Куь алакьунар, чирвилер, кьатIунар чи регионар вилик тухудай чешмеяр я», — лагьана А.Абдулмуслимова, форумдин иштиракчийрихъ элкъвена.
РикIел хкин, форум Росмолодеждин ва РД-дин Гьукуматдин куьмекдалди республикадин жегьилрин крарин рекьяй министерстводи тешкилзава.
Чи мухбир
