25-мартдиз РД-дин Кьил Сергей Меликова «Nordwind» авиакомпаниядин коммерциядин рекьяй директор Антон Маттисахъ галаз гуьруьш кьиле тухвана. Абуру алатай йисуз авиакомпанияди республикада авур кIвалахрин нетижаяр кьуна ва цIи вилик акъвазнавай месэлаяр веревирдна.
Гуьруьшдал малум хьайивал, «Nordwind» авиакомпанияди шаз Дагъустандиз 3 агъзурдалай виниз рейсер тешкилна, санлай къачурла, 456 агъзурдав агакьна пассажирар санай масаниз тухвана. Чкадин агьалийриз уьлкведин жуьреба-жуьре регионриз фин къулай хьун патал республикадин бюджетдай тIвар кьунвай авиакомпаниядиз 33,5 миллион манатдин кьадарда аваз субсидияр чара авуна.
2025-йисуз авиакомпаниядиз Санкт-Петербург, Иваново, Нижний Новгород, Самара, Ижевск, Пермь, Уфа ва маса шегьеррай Дагъустандиз цIийи рейсер кардик кутаз кIанзава.
Сергей Меликова гуьруьшдал къейд авурвал, Дагъустанда туризмдин хел вилик физвай чIавуз «Nordwind» авиакомпаниядихъ галаз амадагвилин алакъаяр хуьнихъ еке метлеб ава.
Чи мухбир
