2-ноябрдиз Россиядин Президент Владимир Путин Кремлда Дагъус­тан­дин Кьил Фёдор Щукинахъ галаз­ гуьруьшмиш хьана. Идакай «Лезги­ газетдиз» РД-дин Кьилин пресс-къул­лугъди хабар гана.

Уьлкведин регьберди ихтилат Фёдор Щукиназ Дагъустандин кьилин къуллугъдал хкягъун тебрикунилай башламишна.

«Им кьетIен регион, Кавказда Рос­сия­дин форпост, гзаф миллетар авай рес­­публика я. ГьакI ятIани, заз куь фикир, гьелбетда, сифте нубатда гзаф да­гъус­танвийри къуллугъзавай адетдин­ диндиз, ата-бубайрин адетриз, дагъус­тан­вийрин медениятдиз лазим тирвал­ гьуьр­мет авунал ва, ихьтин кIва­лах­дал асаслу хьана, чпин бинедаллаз яша­йишдин­ месэлаяр гьялун герек тир экономика,­ санайи еримлу авунин жигьетдай Да­гъустандиз куьмек гунал желб ийиз кIан­зава», – къейдна Владимир Путина.

Гуьруьшдал уьлкведин регьберди, де­мографиядин хиле региондин еришар хъсанбур тирди къейд авуналди, яша­йиш­дин хилез талукь гьакъикъи тапшу­ру­гъар малумарна. Кьилди къачуртIа,          В. Пу­тина Дагъустанда аялар хунин де­режа лап хъсанди я лагьана, амма идахъ галаз сад хьиз яшайиш хъсанару­нин мес­­элаяр гьялунин чарасузвални ава. 

Образованидинни медицинадин мес­элайрикай рахадайла, объектар артухарунин важиблувал къейд авуналди, Владимир Путина лагьана: «Кьве сменада ваъ, са сменада кIелзавай аялрин кьадар артух хьун герек я; кьвед, пуд лагьай сменаяр – тIимиларун. Амбулаториядин, поликлиникадин медицинадин къуллугъ датIана авайдалай хъсанарун лазим я. Гьа ихьтин гьалар аялрин бахчайризни, анра чкайрин кьадардизни талукь жезва».

СВО-дин иштиракчийриз ва абурун хизанриз куьмекар гун кьилдин важиб­лу месэлайрикай я. Уьлкведин Президентди кьетIендаказ къейдна хьи, да­гъустанвийри Ватандиз чпин вафалувал гзаф йисарин муддатда тестикьарзава. «Дагъустанвийри асул месэлайра государстводин тереф активнидаказ хуьзва. Абуру Яракьлу Къуватра къуллугъзава, жуьреба-жуьре, гьа жергедай­ яз вини дережайрин къуллугърални алаз, дяведин махсус серенжемда иштиракзава. Лап хъсандиз, уьтквемвилелди, итимвилелди, кьегьалвилелди женг чIугвазва. Военный къуллугъдал алайбуруз, абурун хизанриз куьмекар гун, абурун те­реф­ хуьн герек я», – лагьана уьлкведин ­Кьили.

Фёдор Щукина Президентдиз рес­пуб­ликада исятда авай гьаларикай ихтилатна. Уьлкведин Кьили Ф. Щукиназ вилик эцигнавай вири тапшуругъар гьялуна агалкьунар хьун алхишна: «Да­гъустандихъ галаз гила куьн таниш я, лугьудайвал, масабурувай ван хьана ваъ, куьн республикадин верховный суддин кьиле хьана ва, гьелбетда, региондин вири месэлаяр чизва. Амма заз куьне фикир гана кIанзава хьи, исятда куь тешкилатчивилин ва вири хилерай активнидаказ крар алакьзавай инсандин ерияр герек жезва».

Вичин нубатда Дагъустандин Кьили Владимир Путиназ ихтибар авунай, тереф хуьнай ва республикадиз датIана фикир гунай чухсагъул малумарна: «Гьи хилера дегишвилер, туьхкIуьрунар герек жезватIа, гьабурун патахъай тайиндиз гъавурда акьунва. Куьне вилик эцигнавай вири тапшуругъар тамамарда», – къейдна Ф. Щукина.

Президентдихъ галаз кьиле фейи гуьруьшдилай кьулухъ Фёдор Щукина Россиядин информациядин ТАСС агентстводиз гайи интервьюда къейд авурвал, гуьруьш хъсанди, яшайишдинни экономикадин са жерге месэлаяр веревирд ийиз алакьайди хьана. Адан гафаралди, Дагъустанда СВО-дин ветеранриз талукь кIвал арадал гъун гуьруьшдин важиблу темайрикай сад хьана. Региондин регьберди СВО-дин иштиракчийриз, ветеранриз ва абурун хизанриз куьмек гуниз талукь герек тир вири серенжемар республикада кьилиз акъудзавайдакай ихтилатна.

«Владимир Владимировичаз чи рес­публикадин вири месэлайрикай дериндай хабар ава. Гьелбетда, и йисан гатфарихъ хьайи кьетIен гьаларин, ятар акьалтунин судурар арадай акъудунин месэлаярни галай-галайвал веревирд­на. И месэлаяр Президентдин хсуси гуьзчивилик ква», – лагьана гуьгъуьнлай Ф. Щукина.

Гуьруьшдин вахтунда республика­ энергетикадин, туризмдин хилерай­ вилик тухунин месэлайрикай ихтилат кудна. «Республикада милли вири­ проектар ва яшайишдинни экономикадин рекьяй еримлу авунин жигьетдай реги­ондин са жерге программаяр кьилиз акъудзава. Гьелбетда, кIватI хьанвай вири месэлаяр садлагьана гьялиз жедач. Абур гьялна кIанзава ва яваш-яваш, пландин бинедаллаз, чахъ авай такьат­ризни мумкинвилериз къимет гуналди ва эвелимжибур яз гьялна кIанзавай мес­элайриз килигуналди, гьялни ийизва», – алава хъувуна Ф. Щукина.

С. Салимов