Дагъустандин полициядин къуллугъчийри и мукьвара къанунсузвилелди гужлуз таъсир ийидай шейэр санай масаниз тухузвайбурун вилик пад кьуна.
Россиядин МВД-дин СКФО-да авай кьилин управленидин къуллугъчийри «Кочубей» ФКПП-дал (федеральный контрольно-пропускной пункт) пар тухудай автомобиль акъвазарна. Рулдихъ къецепатан уьлкведин 41 йисан яшда авай агьали галай. Пар тухудай автомобилдихъ галай прицепда авай са шумуд контейнер дуьздал акъатна, абурун къене таблеткаяр, гьакIни пуд чантада блистерар авай. Санлай къачурла, 271 900 таблетка вахчуна ва абур ахтармишун патал рекье туна.
И делилдай Тарумовский райондин ОМВД-дин силисдин отделди РФ-дин УК-дин 234-статьядин 3-паюнай уголовный дело къарагъарнава. Къадагъа пар тухузвай улакь гьалзавайди РФ-дин УПК-дин 91-статьядин бинедаллаз кьуна.
Гужуналди къакъудна
Дагъустандин МВД-дин къуллугъчийри УФСБ-дин къуллугъчийрихъ галаз санал Къизляр райондин 27 йисан яшда авай ва Къизляр шегьердин 29 йисан яшда авай агьалияр кьуна. Абурал гужуналди чарадавай пул къакъудунай шак физва.
Шак физвайбур абурув чкадин 30 йисан яшда авай агьалиди 50 агъзур манат пул вугайдалай кьулухъ са шумуд сят алатайла, кьуна. Малум хьайивал, абуру чкадин агьалидиз кичIерар ганвай.
Шак физвайбуру агьалидивай алатай йисан декабрдилай инихъ мад 70 агъзур манат пул, «Daewoo Nexia» автомобиль ва чархарин кьве комплект гужуналди къакъуднавай.
Органрин къуллугъчийри ахтармишай вахтунда кьведавайни саки 22 доза мефедрон ва гуьлле гудай жуьреда туькIуьр хъувунвай тапанчи вахчуна.
И делилдай полициядин къуллугъчийри кIватIнавай материал силис тухун патал рекье тунва.
«Лезги газет»
